डुम्रे, कात्तिक २४ : तनहुँका उद्योगी, व्यवसायीले अर्थमन्त्री र गभर्नर समक्ष ज्ञापनपत्र बुझाएका छन् । तनहुँ उद्योग वाणिज्य सङ्घको नेतृत्वमा आज उद्योगी, व्यवसायीको टोलीले सात बुँदे माग राख्दै प्रमुख जिल्ला अधिकारी विश्वप्रकाश अर्यालमार्फत् अर्थमन्त्री र गभर्नरलाई ज्ञापनपत्र बुझाएका हुन् ।
ज्ञापनपत्रमा कर्जाको ब्याजदर एकल अङ्कमा हुनुपर्ने, बैंक तथा वित्तीय संस्थाले विभिन्न शीर्षकमार्फत् सेवा शुल्कका नाममा कुनै पनि शुल्क लिन नपाउने, कर्जाको ब्याजदर पुनःसंरचना गर्नुपर्ने, विगतमा मौद्रिक नीतिमार्फत् दिएको छुट कार्यान्वयन हुनुपर्ने लगायत माग गरिएका तनहुँ उद्योग वाणिज्य सङ्घका अध्यक्ष पविन्द्रकुमार श्रेष्ठले बताउनुभयो ।
ऋणीको उद्योग, व्यापार, व्यवसायको सम्पूर्ण नगद कारोबार चल्ती खातामार्फत् गर्ने व्यवस्था भएकोमा नगद कारोबार कर्जा खातामा नै जम्मा गर्ने व्यवस्था हुनुपर्ने, कर्जा लगानी गरेपश्चात कम्तीमा एक वर्षसम्म ऋणीको सहमति विना ब्याजदरमा कुनै पनि वृद्धि गर्न नहुने उनीहरुको माग छ । बैंक तथा वित्तीय संस्थाले अनुचित रुपमा बढाएको लिलामी प्रक्रिया तत्काल स्थगित हुनुपर्ने माग गरिएको अध्यक्ष श्रेष्ठको भनाइ छ ।
नेपाल उद्योग वाणिज्य महासङ्घका केन्द्रीय सदस्य देवकुमार श्रेष्ठ र पूर्वकेन्द्रीय सदस्य वृषराज श्रेष्ठले संयुक्त रुपमा प्रजिअ अर्याललाई सो ज्ञापनपत्र बुझाउनुभएको हो ।
व्यावसायिक क्षेत्रमा देखिएको आर्थिक अन्यौलता र बैंक तथा वित्तीय समस्याका सम्बन्धमा सम्बन्धित निकायलाई ध्यानाकर्षण गराउने उद्देश्यले सङ्घमा आवद्ध २९ सङ्घ संस्थाको ऐक्यबद्धतामा ज्ञापनपत्र बुझाइएको सङ्घका प्रथम उपाध्यक्ष इमकुमार मल्लले जानकारी दिनुभयो ।
ज्ञापनपत्र बुझ्दै प्रजिअ अर्यालले व्यवसायीको मागसहितको ज्ञापनपत्र तत्काल सम्बन्धित मन्त्रालयमा पठाउने बताउनुभएको छ । तनहुँ उद्योग वाणिज्य सङ्घसँगै चेम्बर अफ कमर्स तनहुँले ज्ञापनपत्र बुझाएको चेम्बरका वरिष्ठ उपाध्यक्ष कविराज श्रेष्ठले जानकारी दिनुभयो । यसअघि जिल्लाभरका करिब चार सय व्यवसायीले हातहातमा प्लेकार्डसहित शान्तिपूर्ण विरोध ¥याली प्रदर्शन गरेका थिए ।
