डडेल्धुरामा मेडिकल कलेज स्थापना गर्न गुरुयोजना निर्माण हुँदैछ : प्रधानमन्त्री

  असार ०३, २०७९

महेन्द्रनगर, असार ३ : प्रधानमन्त्री शेरबहादुर देउवाले सुदूरपश्चिम विश्वविद्यालयमा चिकित्साशास्त्र अध्ययन सुरुआत गर्ने र डडेल्धुरामा मेडिकल कलेज स्थापनाको सम्भाव्यता अध्ययन तथा गुरुयोजना निर्माण गर्ने कार्य अगाडि बढाएको बताउनुभएको छ ।

कञ्चनपुरको महेन्द्रनगरमा सुदूरपश्चिम विश्वविद्यालयद्वारा आज आयोजित दोस्रो दीक्षान्त समारोहमा प्रधानमन्त्री देउवाले सुदूरपश्चिम विश्वविद्यालयलाई मेडिकल कलेज सञ्चालन गर्न आवश्यक बजेटसमेत विनियोजन गरेको बताउनुभयो । विश्वविद्यालयको शिक्षा केवल औपचारिक र सैद्धान्तिक मात्र नभएर व्यवहारिक, जीवनपयोगी तथा समाजको विकास र रुपान्तरणमा सहयोगी हुनुपर्नेमा उहाँको जोड थियो ।

“लोकतान्त्रिक प्रणालीलाई थप सबल र सुदृढ बनाउन र अर्थतन्त्रलाई तीव्र रुपान्तरण गर्न, युग सुहाउँदो, वैज्ञानिक एवम् प्राविधिक जनशक्तिको आवश्यकता पर्दछ”, प्रधानमन्त्री देउवाले भन्नुभयो, “आजको प्रतिस्पर्धी विश्व शैक्षिक बजारमा विश्वविद्यालयले समयानुसार शैक्षिक तथा व्यवस्थापकीय सुधार गर्दै अघि बढ्नुपर्छ ।”

सुदूरपश्चिम विश्वविद्यालयले यहाँका नागरिकको उच्च शिक्षाको पहुँच विस्तार गर्न महत्वर्पूण भूमिका निर्वाह गर्र्दै आएको बताउँदै उहाँले विश्वविद्यालयले दक्ष जनशक्ति उत्पादन गरी मुलुकको खाँचो पूरा गर्न सहयोग पु¥याएको धारणा राख्नुभयो । सो अवसरमा प्रधानमन्त्री देउवाले दीक्षित विद्यार्थीलाई पदक वितरणसमेत गर्नुभयो ।

समारोहमा भारतको कुमाउँ विश्वविद्यालयका कुलपति प्राध्यापक नरेन्द्रकुमार जोशी, शिक्षा, विज्ञान तथा प्रविधिमन्त्री देवेन्द्र पौडेललगायतले आफ्नो धारणा राख्नुभएको थियो ।

सुदूरपश्चिम विश्वविद्यालयका सहकुलपति तथा शिक्षा, विज्ञान तथा प्रविधिमन्त्री देवेन्द्र पौडेलले सुदूरपश्चिम विश्वविद्यालय उच्च शिक्षाको थलोको रुपमा रहेको र यसले  देशको आर्थिक र  सामाजिक रुपान्तरणमा खेल्ने भूमिकालाई अझ प्रभावकारी बनाउनुपर्नेमा जोड दिनुभयो।

समारोहमा कुमाउ विश्वविद्यालयका कुलपति प्राध्यापक नरेन्द्रकुमार जोशीले विद्यार्थीले एउटा लक्ष्य राखेर मात्र नहुने बताउँदै लक्ष्यअनुसार कामलाई अघि बढाउनुपर्ने उल्लेख गर्नुभयो।  उहाँले आफ्नो विश्वविद्यालयले सुदूरपश्चिम विश्वविद्यालयसँग जुनसुकै सहयोग तथा सहकार्य गर्न तयार रहेको बताउनुभयो।

समारोहमा बोल्नुहुँदै उपकुलपति प्रा.डा. अम्मरराज जोशीले सुदूरपश्चिम विश्वविद्यालय क्रमिक रुपमा अगाडि बढिरहेको बताउनुभयो। कार्यक्रममा प्रत्यक्ष रुपमा ३१८ जना विद्यार्थी सहभागी भएका थिए। दीक्षान्त समारेहमा उपस्थित हुन योग्य एक हजार ५५८ जना रहे पनि आवेदन ३१८ को मात्र आएको उपकुलपति जोशीले जानकारी दिनुभयो। समारोहमा तीन जना विद्यार्थीलाई चान्सलर, चार जनालाई भाइस चान्सलर र २९ जनालाई स्वर्ण पदक प्रदान गरिएको छ। सुदूरपश्चिम विश्वविद्यालयमा हाल १६ वटा अंगिक क्याम्पस रहेका छन्।

तपाईको प्रतिक्रिया