जाकार्ता, १८ असोज : इन्डोनेसियाको माउन्ट रिन्जानी राष्ट्रिय निकुञ्जले डढेलोका कारण बन्द गरिएको पश्चिम नुसा तेन्गारास्थित ‘सेनारु’ पदयात्रा मार्ग पुनः सञ्चालनमा ल्याएको छ । निकुञ्ज कार्यालयका अनुसार डढेलो पूर्णरूपमा नियन्त्रणमा आएपछि, सुरक्षा मूल्याङ्कन सम्पन्न गरी शनिबारदेखि उक्त मार्ग पर्यटकका लागि पुनः खुला गरिएको हो ।
निकुञ्जका अधिकारी आस्तेकिता आर्दियार्सितोले आगो पूर्णरूपमा निभाइएको पुष्टि भएपछि पदयात्रा मार्ग, सुविधा तथा पूर्वाधारको निरीक्षण गरिएको र त्यसपछि मार्ग सञ्चालनमा ल्याइएको जानकारी दिनुभयो । उहाँका अनुसार अब पदयात्रीले अनलाइनमार्फत दर्ता गरेर यात्रा गर्न सक्ने छन् । सेनारु मार्ग पुनः सञ्चालनसँगै माउन्ट रिन्जानीका पाँच वटै प्रमुख पदयात्रा मार्ग अहिले खुला भएका छन् ।
गत सेप्टेम्बर २२ मा टोरियन रिसोर्ट क्षेत्र अन्तर्गत सेताम्पोल पहाडमा लागेको डढेलोले सेप्टेम्बर २९ सम्म करिब एक हजार ९८ हेक्टर वन क्षेत्र प्रभावित गरेको थियो । निकुञ्ज प्रशासनले आगो पुनः सल्किन नदिन ड्रोनमार्फत नियमित निगरानी र स्थलगत गस्तीलाई निरन्तरता दिएको जनाएको छ । (रासस/सिन्ह्वा)
