कैलाली, २९ साउन : सुदूरपश्चिम प्रदेशका नवनियुक्त मुख्यमन्त्री खगराज भट्टले पद तथा गोपनीयताको शपथग्रहण गर्नुभएको छ । आज प्रदेश कार्यालयमा आयोजित विशेष समारोहमा प्रदेश प्रमुख नजिर मियाँले मुख्यमन्त्री भट्टलाई पद तथा गोपनीयताको शपथ गराउनुभएको हो ।
यसअघि आज बिहान प्रदेश प्रमुख मियाँले भट्टलाई सुदूरपश्चिम प्रदेश सरकारको मुख्यमन्त्रीमा नियुक्त गर्नुभएको थियो । मुख्यमन्त्री नियुक्तिका लागि भट्टले प्रदेश प्रमुखको कार्यालयमा पुगेर दाबी पेस गर्नुभएको थियो ।
उहाँको दाबीलाई नेपाल कम्युनिष्ट पार्टी (एमाले) संसदीय दलका नेता राजेन्द्रसिंह रावलले समर्थन गर्नुभएको थियो । दाबी पेसपछि प्रदेश प्रमुखले संविधानबमोजिम भट्टलाई मुख्यमन्त्री पदमा नियुक्त गर्नुभएको हो । आज शपथग्रहण गर्नुभएका भट्टले सुदूरपश्चिमको मुख्यमन्त्रीको जिम्मेवारी सम्हाल्नुभएको यो पाँचौँपटक हो ।
मुख्यमन्त्री भट्टको शपथसँगै सुदूरपश्चिम प्रदेश सरकार गठनको प्रक्रिया अघि बढेको छ । एमालेबाट सरकारमा सहभागी हुने मन्त्रीहरूले आजै पद तथा गोपनीयताको शपथ लिनुभएको राससमा उल्लेख छ ।
