चीन र संयुक्त राज्य अमेरिकाले सोमबार मेड्रिडमा व्यापार वार्ता पुनः सुरु गरेका छन् । दुवै देशबीच व्यापार र प्रविधिमा चर्किएको विवाद कम गर्नु वार्ताको उद्देश्य रहेको छ । विवादले दुई ठूला अर्थतन्त्रका सम्बन्धलाई तनावपूर्ण बनाएको छ ।
अमेरिकी अर्थमन्त्री स्कट बेसेन्ट र चिनियाँ उपप्रधानमन्त्री हे लिफेङको नेतृत्वमा प्रतिनिधिमण्डलले वार्ताको नयाँ चरण सुरु गरेको हो । छलफल आइतबार प्रारम्भ भएको थियो र स्पेनको विदेश मन्त्रालयमा सोमबार पुनः आरम्भ भयो । बैठकहरू बुधबारसम्म चल्ने अपेक्षा गरिएको छ ।
घटनास्थलमा रहेका एएफपी पत्रकारका अनुसार सोमबार बिहानै दुवै पक्षका अधिकारीहरू मन्त्रालयको मुख्यालयमा प्रवेश गरेका देखिएका थिए ।
वार्ताको एजेन्डामा दुई कडा विषय प्रमुख छन्—अमेरिकी राष्ट्रपति डोनाल्ड ट्रम्पले चिनियाँ आयातमा थप भन्सार शुल्क लगाउने धम्की र वासिङ्टनले टिकटकलाई सेप्टेम्बर १७ सम्म गैर–चिनियाँ मालिकलाई बेच्नुपर्ने वा अमेरिकी प्रतिबन्धको सामना गर्नुपर्ने माग ।
यस वर्षको सुरुतिर व्यापार तनाव तीव्र बनेको थियो । दुवै देशले एक–अर्कालाई तोकिएका सामानमा शतप्रतिशत नजिक पुग्ने गरी भन्सार शुल्क लगाएपछि आपूर्ति शृङ्खला अवरुद्ध गरेको थियो ।
तर पछि दुवै सरकारले अमेरिकी सामानमा ३० प्रतिशत र चिनियाँ निर्यातमा १० प्रतिशत भन्सार शुल्क फिर्ता लिन सहमति जनाए । यद्यपि, यो अस्थायी युद्धविराम नोभेम्बरसम्म मात्र रहनेछ ।
गत हप्ता बेइजिङले वासिङ्टनलाई ‘आपसी सम्मान र समान परामर्श’ का आधारमा विवाद समाधान गर्न आग्रह गरेको थियो ।
तर सप्ताहन्तमै चीनले अमेरिकी सेमिकन्डक्टर उद्योगमाथि अनुसन्धान सुरु गरेपछि मेड्रिड वार्ता भए पनि सम्बन्ध अझै तनावपूर्ण रहेको सङ्केत दिएको छ ।
यी छलफलहरूले वर्षको अन्त्यतिर अमेरिकी राष्ट्रपति ट्रम्प र चिनियाँ राष्ट्रपति सी जिनपिङबीच हुने सम्भावित शिखर सम्मेलनको आधार तयार गर्न सक्छन् ।
त्यसअघिसम्म, वार्ताकारहरूले प्रविधि पहुँच, भन्सार शुल्क र दुर्लभ खनिज तत्व निर्यातसम्बन्धी विवाद समाधान गर्दै अस्थायी युद्धविरामलाई स्थिर राख्ने कठिन चुनौती सामना गर्नेछन् ।
रासस
