नेपालले जेरिएट्रिक चिकित्सकहरूको एक प्रमुख अन्तर्राष्ट्रिय सम्मेलन एशिया प्यासिफिक जेरिएट्रिक्स नेटवर्क सम्मेलन २०२५ डिसेम्बर ६ मा आयोजना हुने भएको छ । यो सम्मेलनमा अमेरिका, बेलायत, अष्ट्रेलिया, जापान, मलेसिया, भारत, चीन, स्विट्जरल्यान्ड लगायत १५ भन्दा बढी देशका प्रतिनिधिहरूको सहभागिता रहने अपेक्षा गरिएको छ।
यस वर्षको सम्मेलनको विषयवस्तु “समुद्रदेखि हिमालयसम्म: ज्येष्ठ नागरिक सेवा रूपान्तरणमा एक साथ” भन्ने रहेको छ जसले विविध क्षेत्र र स्वास्थ्य प्रणालीहरूमा ज्येष्ठ नागरिकको जीवनस्तर सुधार गर्ने साझा प्रतिबद्धतालाई झल्काउँछ । यो विषयवस्तुले नेपालको विशिष्ट भौगोलिक तथा सांस्कृतिक अवस्थालाई विश्वव्यापी सहकार्यको केन्द्रको रूपमा पनि चित्रण गर्ने आयोजकको दाबी छ ।
सम्मेलनमा जेरिएट्रिक चिकित्सा, वृद्धावस्था सम्बन्धी अनुसन्धान, दीर्घकालीन सेवा, र सार्वजनिक स्वास्थ्य क्षेत्रका अग्रणी आवाजहरूलाई एकत्रित गरी वृद्ध जनसंख्याको चुनौती र समाधानबारे छलफल गरिनेछ । एशिया प्यासिफिक क्षेत्र तथा विश्वभर जीवन प्रत्याशा बढ्दो अवस्थामा रहेकोले, यो सम्मेलन ज्येष्ठ नागरिकमैत्री नीति, समावेशी स्वास्थ्य सेवा, र ज्येष्ठ नागरिकहरूको लागि सहयोग प्रणाली विकास गर्ने दृष्टिले अति महत्वपूर्ण अवसरको रूपमा आएको छ।
सम्मेलनका प्रमुख संयोजक तथा जेरिएट्रिक विशेषज्ञ डा.जगदीश कुमार क्षेत्रीका अनुसार, यो कार्यक्रमले निम्न-आय भएका देशहरू जसमा नेपाल पनि पर्छ—तर्फ विश्व समुदायको ध्यानाकर्षण गराउनेछ, जहाँ अहिले मानिसहरू पहिलेभन्दा धेरै लामो समयसम्म बाँचिरहेका छन् । कार्यक्रम आयोजकहरूमा नेपाल जेरिएट्रिक्स तथा जेरन्टोलोजी समाज, नेपाल जेरिएट्रिक समाज लगायतका संघसंस्थाहरू रहेका छन् । उनीहरूले विभिन्न देश र विषयगत क्षेत्रमा सहकार्यको आवश्यकता रहेकोमा जोड दिएका छन् ।
सम्मेलनमा डिमेन्सिया र पार्किन्सन रोगको व्यवस्थापन, जेरिएट्रिक चिकित्सा शिक्षादेखि प्रविधि प्रयोग, केयरगिभिङ, मानव स्रोत विकास, र ज्येष्ठ नागरिकहरूको लागि नयाँ सेवा मोडलहरू जस्ता विषयहरूमा विशेष सत्रहरू हुनेछन् ।यो सम्मेलन नेपाल सरकार र विश्व स्वास्थ्य संगठनको सहयोगमा आयोजना हुनेछ।
एशिया प्यासिफिक जेरिएट्रिक्स नेटवर्क, जो जेरिएट्रिक पेशेवरहरूको एक प्रतिष्ठित क्षेत्रीय मञ्च हो, यो सम्मेलनमार्फत विकसित र विकासशील दुवै मुलुकहरूका लागि नयाँ साझेदारीहरू विकास गर्ने, सफल अभ्यासहरू साझा गर्ने र वृद्ध सेवा प्रणालीको भविष्य निर्माण गर्ने लक्ष्य लिइएको आयोजकको भनाइ छ ।
