न्युयोर्क, ३० भदौ : संयुक्त राष्ट्रका एक वरिष्ठ अधिकारीले सुडानले विश्वको सबैभन्दा ठूलो भोकमरी र विस्थापन सङ्कटको सामना गरिरहेको चेतावनी दिनुभएको छ । राष्ट्रसङ्घका अनुसार दुई करोड मानिस तीव्र भोकमरीबाट पीडित छन् भने एक करोड ४० लाख विस्थापित भएका छन् ।
कोषको अभावले संयुक्त राष्ट्र सहायता एजेन्सीलाईसमेत निकट भविष्यमा आवाश्यक अपरेसन सञ्चालनमा बाधा पुगेको छ । सुडानको आठ दिने भ्रमणको समापनमा, संयुक्त राष्ट्र विश्व खाद्य कार्यक्रम (डब्ल्यूएफपी) का कार्यवाहक निर्देशक ए कार्ल स्काउले करिब पाँच लाख मानिसले भोकमरीको आपतकालीन स्तरको सामना गरिरहेको बताउनुभएको छ ।
जसलाई एकीकृत खाद्य सुरक्षा चरण वर्गीकरण (आईपीसी) को चरण ४ अन्तर्गत वर्गीकृत गरिएको छ । उहाँले मानवतावादी कार्यकर्ता प्रभावित समुदायमा पुग्न असमर्थ भएकोसमेत बताउनुभयो । एक समय करिब १० लाख जनसङ्ख्या भएको र प्रमुख क्षेत्रीय राजधानीका रूपमा सेवा गरेको सहरले अनिकाल र अकल्पनिय अत्याचारसहित १८ महिनाको घेराबन्दीको सामना गरेको उल्लेख गर्दै उहाँले हालको अवस्था अत्यन्तै कठोर रहेको बताउनुभएको छ ।
वर्षादेखि आफ्नो परिवारलाई जोगाउन महिलाले अनुरोध गरेको तिरपालसहित राम्रो आश्रयको प्रावधानका साथ केही अवस्था सुधार भएको उहाँले उल्लेख गर्नुभएको छ । डब्लुएफपीले पनि आफ्नो सञ्चालन विस्तार गरेको छ, हाल प्रत्येक महिना एल फासेरमा करिब ९ लाख ५० हजार मानिससम्म पुगेता पनि, सहायता अपर्याप्त भएको जनाइएको छ ।
राष्ट्रसङ्घका अधिकारीका अनुसार, परिवारले आधा राशन मात्र पाउँछन् यसबाहेक, शिक्षा, स्वास्थ्य सेवा, आश्रय, र बच्चाका लागि सुरक्षित खेल मैदानको गम्भीर अभावका बीचमा आफ्ना पति वा छोराहरू गुमाउने महिलाले परिवारको नेतृत्व गर्छन । खडेरीले जनसङ्ख्यामाथि दबाब बढाइरहेको कुरा औंल्याउँदै उहाँले कृषि र पशुधनमा यसको प्रभावबारे स्थानीय समुदायको डरलाई उजागर गर्नुभयो ।
जोखिमको बावजुद, डब्ल्यूएफपी प्रत्येक महिना ४ देखि ५ लाख मानिस सामु पुग्ने प्रयास जारी राखेको स्काउले बताउनुभयो । अतिरिक्त स्रोत सुरक्षित नगरे आगामी हप्तामा एजेन्सीले पर्याप्त मात्रामा सञ्चालन घटाउन बाध्य हुन सक्ने चेतावनी दिँदै उहाँले कार्यक्रमको सञ्चालनले अहिले सामना गरिरहेको सबैभन्दा ठुलो बाधा कोषको अभाव भएको कुरामा जोड दिनुभएको छ । (रासस/क्युएनए)
