काठमाडौँ, मङ्सिर १४ : प्रेस काउन्सिल नेपालको आयोजना तथा युनेस्कोको सहयोगमा ‘लैङ्गिक संवेदनशील मिडिया निर्माणमा सङ्घ संस्थाको भूमिका’ विषयक एकदिने कार्यशाला काठमाडौँमा सम्पन्न भएको छ ।
कार्यशालाको उद्घाटनसत्रमा प्रेस काउन्सिल नेपालका अध्यक्ष बालकृष्ण बस्नेतले लैङ्गिक संवेदनशील मिडिया निर्माणका लागि काउन्सिल सदैव प्रयत्नशील रहेको बताउनुभयो ।
उहाँले काउन्सिलले निर्देशिकाको निर्माण र कार्यान्वयन गरी मिडियालाई लैङ्गिकमैत्री बनाउने प्रयत्न गरेको बताउनुभयो । काउन्सिलले जारी गरेको महिला सञ्चार निर्देशिकाको परिमार्जनका विज्ञको सुझाव लिन युनेस्कोसँगको सहकार्यमा भएको कार्यशालाबाट प्राप्त सुझाव महत्वपूर्ण हुने उहाँको भनाइ थियो ।
कार्यशालामा नेपाल पत्रकार महासङ्घका अध्यक्ष विपुल पोख्रेलले लैङ्गिक सवाल महिलाको मात्र नभई सबैको साझा मुद्दा हो भन्नेतर्फ सजग रहनुपर्ने बताउनुभयो । उहाँले नागरिक समाज सचेतताका विषयमा मिडियाले मूल्याङ्कन गरी सम्बन्धित पक्षको ध्यानाकर्षण गराउने भएको प्रष्ट पार्नुभयो ।
पोख्रेलले लैङ्गिक संवेदनशीलताका क्षेत्रमा पत्रकार महासङ्घबाट समेत महिला निर्देशिका पालना गर्न र महिलामैत्री वातावरण निर्माण गर्न पहलकदमी भइरहेको उल्लेख गर्नुभयो ।
कार्यशालाको उद्घादनसत्रको सहजीकरण काउन्सिलका सदस्य ठाकुर बेलवासेले गर्नुभएको थियो । कार्यक्रममा काउन्सिलका सदस्य दीपक पाण्डे, राष्ट्रिय समाचार समितिका महाप्रबन्धक सिद्धराज राई लगायतले मन्तव्य राख्दै मिडियालाई लैङ्गिकमैत्री बनाउन आफूहरूको साथ रहने बताउनुभयो ।
एकदिने कार्यशालामा काउन्सिलका अध्यक्ष बालकृष्ण बस्नेतले ‘लैङ्गिक संवेदनशील मिडिया नीति निर्माण र कार्यान्वयनमा प्रेस काउन्सिलको भूमिका’ विषयक कार्यपत्र प्रस्तुत गर्नुभएको थियो । यस्तै डा समीक्षा कोइरालाले ‘मिडियामा लैङ्गिकताका विषय र महिला उत्तरदायी सञ्चार निर्देशिका’ विषयक कार्यपत्र प्रस्तुत गर्नुभएको थियो ।
पत्रकार कृष्णा पौडेलले ‘नेपाली सञ्चारमाध्यममा लैङ्गिक संवेदनशीलता’ विषयक कार्यपत्र प्रस्तुत गर्नुभएको कार्यक्रममा सञ्चारिका समूहकी पूर्वअध्यक्ष नितु पण्डितले ‘मिडिया, लैङ्गिकता र सामाजिक सङ्घसंस्था’ विषयक कार्यपत्र प्रस्तुत गर्नुभएको थियो ।
अन्तक्र्रियामा काउन्सिलले गरिरहेको अनुगमन र कारबाहीका सम्बन्धमा उठेका सवालबारे मुख्य अधिकृत झविन्द्र भुसालले प्रष्ट पार्नुभएको थियो । फरकफरक समूह बनाई विषयगत छलफल भएको कार्यक्रममा लैङ्गिक तथा महिलाका क्षेत्रका क्रियाशील विभिन्न सङ्घसंस्थाका ५७ जना सहभागी थिए ।
