काठमाडाैं, चैत ४ : सरकारले कोरोना भाइरस संक्रमितको उपचारमा खटिने डाक्टर र नर्सलाई ७५ प्रतिशत भत्ता दिने निर्णय गरेको छ । उपप्रधानमन्त्री ईश्वर पोखरेलको संयोजकत्वमा रहेको कोरोना भाइरस रोकथाम तथा नियन्त्रण उच्चस्तरीय समितिको सोमबार बसेको बैठकले यस्तो निर्णय गरेको हो । उपचारमा खटिने अन्य स्वास्थ्यकर्मीलाई ५० प्रतिशत भत्ता दिइनेछ ।
त्यस्तै, संक्रमण रोकथाम तथा नियन्त्रणसँग सम्बन्धित कार्यमा खटिने निजामती, सुरक्षाकर्मी र नागरिक उड्डयन कार्यालयका कर्मचारीलाई पनि सुरु तलबमानको ५० प्रतिशत भत्ता दिने निर्णय समितिले गरेको छ ।
संक्रमितको उपचारका लागि स्वास्थ्य मन्त्रालयले काठमाडौं उपत्यकाभित्र एक सय २० वटा आइसियू बेड अविलम्ब थप्ने निर्णय समितिले गरेको छ । टेकुस्थित शुक्रराज ट्रपिकल तथा सरुवारोग अस्पताल, वीर, पाटन, सैनिक अस्पताल, सशस्त्र प्रहरी अस्पताल र आयुर्वेद अस्पताल कीर्तिपुरमा २०–२० आइसियू बेड थपिने समितिले जनाएको छ । त्यस्तै, प्रदेशहरूमा आवश्यकताअनुसार कम्तीमा एक सय १५ वटा आइसियू बेडको व्यवस्था गर्न समितिले निर्देशन दिएको छ ।
कोरोना संक्रमितको उपचारका लागि खरिपाटीस्थित विद्युत् प्राधिकरणको तालिम केन्द्रलगायत उपत्यकामा रहेका स्वास्थ्य मन्त्रालयले तोकेका विभिन्न अस्पताल तथा भवनमा एक हजार बेडको व्यवस्था मिलाउने निर्णय पनि समितिले गरेको छ ।
उपचारमा कम्तीमा नौ सय ३६ स्वास्थ्यकर्मी खटाइने
कोरोना भाइरस संक्रमणको उपचारका लागि सरकारले उपत्यकाका ६ अस्पताललाई तोकेको छ । हरेक अस्पतालमा एक सय ५६ स्वास्थ्यकर्मी खटाउने सरकारको तयारी छ ।
स्वास्थ्य मन्त्रालयका प्रमुख विशेषज्ञ डा. रोशन पोखरेलको संयोजकत्वमा गठित कोभिड– १९ द्रुत सम्भाव्यता अध्ययन कार्यदलले सोमबार २० वटा आइसियू बेड सञ्चालनका लागि एक सय ५६ स्वास्थ्यकर्मी आवश्यक हुने प्रस्ताव मन्त्रालयमा पेस गरेको छ । ४० बेड आइसियू सञ्चालन हुने अस्पतालमा तीन सय १२ स्वास्थ्यकर्मी खटिनेछन् । कार्यदलको प्रस्तावअनुसार मन्त्रालयले स्वास्थ्यकर्मी खटाउने तयारी गरेको छ । आइसियू व्यवस्थापनका लागि आवश्यक पर्ने ५१ प्रकारका उपकरण खरिदका लागि सूचीसहितको प्रस्ताव कार्यदलले मन्त्रालयमा पेस गरेको छ ।
२० बेड आइसियू भएका अस्पतालमा चारजना एनेस्थेसिया विशेषज्ञ, चार क्रिटिकल केयर र इन्टरनल मेडिसिन विशेषज्ञ, १६ मेडिकल अफिसर, आठ नर्सिङ अफिसर, एक सय स्टाफ नर्स, १० प्रशासनिक कर्मचारी र १५ जना कार्यालय सहयोगी खटाइनेछन् । ४० बेड आइसियू सञ्चालन गरेको अवस्थामा त्यही अनुपातमा स्वास्थ्यकर्मी खटाइनेछन् ।
स्वास्थ्य मन्त्रालयले अस्पतालहरूमा आइसियू निर्माणका लागि अर्थ मन्त्रालयसमक्ष बजेट प्रस्ताव गरेको छ । स्रोतका अनुसार टेकु अस्पतालले ४० बेड आइसियू सञ्चालन गर्ने भएकाले सबै व्यवस्थापनका लागि २३ करोड ५० लाख प्रस्ताव गरिएको छ । अन्य चार अस्पताललाई १२ करोड ५० लाखका दरले दिने प्रस्ताव गरिएको छ ।
टेकु अस्पतालका कर्मचारी प्रशासन शाखा प्रमुख रूपनारायण खतिवडाका अनुसार विषम परिस्थितिसँग जुध्न खटिएका करारका स्वास्थ्यकर्मीलाई तलब स्केलको ७५ प्रतिशत भत्ताको समेत व्यवस्था गरिएको छ । तर, स्थायी रूपमा काम गरिरहेका ल्याब, रेडियोलोजी, नर्सिङ जनशक्तिलाई भने २५ प्रतिशत भत्ता दिइनेछ । उनीहरूले सम्बन्धित अस्पतालबाट नियमित भत्ता पाउँदै आएका छन् ।
सोमबार १८ जनाको कोरोना परीक्षण
राष्ट्रिय जनस्वास्थ्य प्रयोगशाला टेकुमा सोमबार १८ जनाको कोरोना भाइरस (कोभिड–१९) को नमुना परीक्षण गरिएको छ । तर, सबैको नतिजा नेगेटिभ आएको प्रयोगशालाकी निर्देशक डा. रुणा झाले बताइन् ।
आइतबारसम्म चार सय ६० जनाको नमुना परीक्षण गरिएको छ । अहिलेसम्म नेपालमा एकजनामा मात्रै कोरोना भाइरस पुष्टि भएको छ । प्रयोगशालाले कडा प्रकारको श्वासप्रश्वास भएर आइसियूमा भर्ना भएका बिरामीको पनि कोरोना परीक्षण थालेको छ । त्यसका लागि काठमाडौंका दश अस्पताल तोकिएको छ ।
यसैबीच, चिकित्सकहरूको छाता संगठन नेपाल चिकित्सक संघले कोरोनाको संकट समाधानका लागि आवश्यक परे सहयोग गर्न तयार रहेको बताएको छ । संघले सोमबार विज्ञप्ति जारी गर्दै सरकारलाई जुनसुकै परिस्थितिमा पनि सहयोग गर्न तयार रहेको बताएको छ ।
