काठमाडौँ, फागुन ८ : नेकपा एमालेका अध्यक्ष केपी शर्मा ओलीले समयमै एमसिसी संसदमा नल्याउँदा सडकमा अराजकता भएको बताउनु भएको छ ।
आइतबार संसदमा एमसिसी टेबल भएपछि बानेश्वरमा आफ्ना सांसदहरूसँग अनौपचारिक छलफलमा उहाँले नेपाल विदेशी शक्ति राष्ट्रको क्रिडास्थल बन्न पुगेको बताउनु भएको हो ।
एमसिसी संसदमा टेबल नगर्दा दुई शक्ति राष्ट्रबीचको भनाभनको स्थिति बनेको बताउनु भयो ।
“पहिला दुईदुई सभामुख हुँदा यो पेस गरिएन जसले गर्दा सडकमा यो खालको अवस्था पैदा भयो। अराजकता र अस्थिरताको स्थिति उत्पन्न भयो”, ओलीले भन्नु भयो ।
अमेरिकी सहयोग परियोजना एमसिसीसम्बन्धी सम्झौता प्रतिनिधि सभामा आज टेबल भएको छ । सञ्चार तथा सूचना प्रविधिमन्त्री ज्ञानेन्द्रबहादुर कार्कीले आइतबारको प्रतिनिधि सभा बैठकमा एमसिसी टेबल गर्नु भएको हो ।
मन्त्री कार्कीले प्रतिनिधि सभा नियमावली २०७५ को नियम २२२ बमोजिम सम्झौतालाई प्रतिनिधि सभा समक्ष पेस गर्नुभयो । उहाँले एमसिसी सम्झौता संविधानको सर्वोच्चता र सर्वोपरीभन्दा कुनै पनि व्यवस्था र शर्तमाथि नभएको स्पष्ट पार्नुभयो ।
