काठमाडौँ, फागुन ५ : अमेरिकी आर्थिक सहायता परियोजना मिलेनियम च्यालेन्ज कर्पाेरेसन (एमसीसी)को विषयमा साझा धारणा बनाउन बिहीबार सत्ता गठबन्धन दलहरूको बैठक बस्ने भएको छ । प्रधानमन्त्री शेरबहादुर देउवा र नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहालबीच बुधबार भेटवार्ता भएपछि सत्ता गठबन्धनमा सहभागी दलहरूको बैठक बिहीबारका लागि डाकिएको हो ।
अध्यक्ष दाहालका स्वकीय सचिव रमेश मल्लका अनुसार, संसद् अवरुद्ध भइरहेको बेला एमसीसी टेबल गर्ने कुरा तत्काल सान्दर्भिक नभएकाले सत्तारूढ दलको बैठक डाक्न अध्यक्ष दाहालले राख्नुभएको प्रस्तावमा प्रधानमन्त्री देउवा सहमत भएपछि बैठक बोलाइएको गोरखापत्र अनलाइनले जनाएको छ ।
प्रधानमन्त्री देउवा र अध्यक्ष दाहालबीच बुधबार भएको भेटवार्तामा बिहीबार सत्तारूढ दलको बैठकपछि मात्र अघि बढ्ने सहमति भएको छ । सरकारले बुधबार नै एमसीसीको प्रस्ताव सदनमा टेबुल गर्ने योजना बनाएको थियो । माओवादी केन्द्र संसदीय दलको बैठक सकेर अध्यक्ष दाहाल प्रधानमन्त्री देउवालाई भेट्न बालुवाटार पुग्नुभएको थियो । भेटमा अध्यक्ष दाहालले प्रधानमन्त्री देउवासँग तत्काल एमसीसी टेबल नगर्न आग्रह गर्नुभएको मल्लले जानकारी दिनुभयो ।
बुधबार बसेको माओवादी केन्द्र संसदीय दलको बैठकले संसद्भित्र सहमति जुटाएर मात्र एमसीसीलाई अघि बढाउनुपर्ने निर्णय गरेको छ । बैठकपछि माओवादी संसदीय दलका प्रमुख सचेतक देव गुरुङले भन्नुभयो, “एकातिर संसद् अवरुद्ध छ । संसद्को अवरोध नहटाई एमसीसी जस्तो विषयले प्रवेश पाउने कुरा हुँदैन । दलहरूबीच सहमतिबिना एमसीसीले संसद्मा प्रवेश पाए सत्तारूढ गठबन्धन कमजोर हुन जानेछ ।” बुधबार माओवादी केन्द्रका भ्रातृ सङ्गठनहरूले नयाँ बानेश्वरमा एमसीसीका विरोधमा प्रदर्शन गरेका छन् । ती प्रदर्शनमा पार्टीका नेता नारायणकाजी श्रेष्ठको पनि सहभागिता रहेको थियो ।
अर्को बैठकमा पेस हुने
कानुन, न्याय तथा संसदीय मामिलामन्त्री दिलेन्द्रप्रसाद बडूले राजनीतिक सहमतिमै प्रतिनिधि सभाको अर्को बैठकमा एमसीसी सम्झौता पेस हुने बताउनुभएको छ । प्रतिनिधि सभाको बुधबारको बैठकबाट बाहिरिने क्रममा उहाँले सहमतिका लागि नै बुधबार प्रस्तावअघि नबढाइएको बताउनुभयो । अर्को बैठक फागुन ६ गतेका लागि बोलाइएको छ ।
दुई दिनमा सर्वपक्षीय सहमतिमा नै प्रस्ताव अघि बढाइने बताउँदै उहाँले भन्नुभयो, “सहमतिका लागि नै हामीले एमसीसीलाई अघि बढाउन रोकेका हौँ । दुई दिनको समय छ । यसबीचमा सहमति गरेर पेस गर्छौं ।” सत्ता साझेदार दलहरूबीच नै विवाद भएपछि बुधबार प्रक्रिया अघि बढेन । प्रधानमन्त्री देउवा र नेकपा (माओवादी केन्द्र)का अध्यक्ष प्रचण्डबीच बिहीबार सर्वदलीय बैठकबाट निकास खोज्ने सहमति भएकै आधारमा प्रतिनिधि सभा कार्यव्यवस्था परामर्श समितिले बुधबारको दैनिक कार्यसूचीमा एमसीसी सम्झौताको प्रस्ताव नसमेटिएको हो ।
संशोधन आवश्यक : खनाल
नेकपा (एकीकृत समाजवादी)का सम्मानित नेता झलनाथ खनालले अमेरिकी आर्थिक सहायता परियोजना मिलेनियम च्यालेन्ज कर्पाेरेसन (एमसीसी) जबरजस्ती गरेर पारित गर्न नहुने बताउनुभएको छ । उहाँले देश र जनतालाई सर्वाेपरि राखेर एमसीसी सम्झौता गर्र्नुपर्नेमा जोड दिँदै जनतालाई अन्योलमा राखेर गरिएको सम्झौता राष्ट्रिय हितमा हुँदैन भन्नुुभयो । सञ्चारकर्मीलाई संक्षिप्त प्रतिक्रिया दिँदै उहाँले एमसीसीमा केही संशोधन गर्नुपर्ने आवश्यकता औंल्याउनुभयो ।
एमसीसी टेबुल गर्न सहमति जुटाउने प्रयास जारी : कानून मन्त्री
कानून, न्याय तथा संसदीय मामिलामन्त्री दिलेन्द्रप्रसाद बडूले अमेरिकी सहयोग परियोजना मिलेनियम च्यालेञ्ज कर्पाेरेशन (एमसीसी) सम्झौतालाई सदनमा प्रवेश गराउने विषयमा निरन्तर प्रयास भएको र सहमति जुटाउन पर्सीसम्मका लागि समय निर्धारण गरिएको जनाउनुभएको छ ।
प्रतिनिधिसभाको बुधबारको बैठकबाट बाहिरिने क्रममा मन्त्री बडुले एमसीसीबारे सडकमा उठेका बहस र विवादलाई टुङ्गोमा लानका लागि पनि सो प्रस्तावलाई संसद्मा लानुपर्ने बताउनुभयो । मन्त्री बडूले भन्नुभयो, “यो विषयलाई संसद्मा प्रवेश गराउने र छलफलमा लाने हाम्रो उद्देश्य हो । छलफलका निमित्त दललाई अझै केही समय चाहिन्छ भन्ने आएकाले थप सहमति जुटाएर अबको बैठकमा टेबल गर्ने सहमति बनाउँदैछौँ ।”
प्रतिनिधिसभाको अर्काे बैठक यही फागुन ६ गते शुक्रबार दिउँसो १ बजे तोकिएको छ भने सत्ता गठबन्धनका शीर्ष नेताहरुको बैठक ५ गते दिउँसो बोलाइएको छ । नेकपा (एकीकृत समाजवादी) का वरिष्ठ नेता झलनाथ खनालले जनतालाई गुमराहमा राखेर एमसिसी सम्झौता गरिएकाले त्यसमा संशोधन नभएसम्म प्रस्ताव अघि बढ्न नहुने अडान राख्नुभयो । उहाँले भन्नुभयो, “कतिपय विषयमा दशौँ वर्ष लगाएर सहमति हुन्छ । कतिपय विषय परिस्कृत हुन्छ, परिमार्जन हुन्छ, बदलिन्छ, अनिमात्रै सहमति हुन्छ । असहमतिका विषयमा बल प्रयोग गरेर हुन्छ ?” सडकमा विरोध र सरकारमा पनि बस्ने कुरा एकैसाथ हुन्छ र भन्ने पत्रकारको प्रश्नमा पूर्वप्रधानमन्त्री खनालको जवाफ थियो, “किन नहुनु मज्जाले हुन्छ । यहाँ भइरहेको छ देख्नुभएन ?”
नेकपा (माओवादी केन्द्र)का नेता ओनसरी घर्तीले एमसिसी राष्ट्रिय सरोकारको विषय भएको र प्रतिपक्षी दल अहिले पनि विरोधको स्थितिमा रहेकाले सबैको सहमतिमा अघि बढ्न दल एकै ठाउँमा बसेर छलफल नगरिकन अघि नबढौँ भन्ने हाम्रो आग्रहबमोजिम आजको बैठकमा सो प्रस्ताव पेश नभएको बताउनुभयो । उहाँले भन्नुभयो, “गठबन्धनभित्रका कुनै दलले सो प्रस्तावबारे आफ्नो निर्णय गर्न सक्ने र अरु दलले त्यसलाई नमान्न पनि सक्छ । प्रतिपक्षको अवरोध कायम रहेकाले पनि आज टेबुल गर्नतिर गइएन ।”
