बेइजिङ, माघ १७ : चिनियाँ राष्ट्रपति सि चिनफिङले विश्वमा कोभिड १९ जस्तो महामारीको नियन्त्रणका लागि विश्वका सबै देशको संयुक्त प्रयास हुनुपर्ने बताउनुभएको छ ।
उहाँले शुक्रबार विश्वका नेतासँगको फोनवार्ताका क्रममा महामारी नियन्त्रणका साथै विकासका सम्भावनाको बारेमा थप आदानप्रदान गर्नका लागि विश्वका नेताको संयुक्त प्रयास हुनु आवश्यक रहेको बताउनुभएको हो ।
राष्ट्रपति सिले हाल विश्वमै रहेको कोरोना भाइरसको यो महामारी कुनै एक देश तथा क्षेत्रको मात्र नभएर विश्वकै समस्याका रुपमा देखिएकोले यसको समाधानका लागि विश्वका नेता एक आपसमा समन्वय गरेर लाग्नुपर्ने बताउनुभयो ।
उहाँले शुक्रबार बोलिभिया, दक्षिण कोरिया, बेलारुसका राष्ट्रपति तथा डोमिनिकन प्रधानमन्त्रीसहितका नेतासँग फोनवार्ता गर्नुभएको थियो ।
सो फोन वार्ताका क्रममा उहाँले महामारीका साथै अन्य विकासका कार्यमा पनि सहकार्य र समन्वयसहितको प्रयासका लागि आग्रह गर्नुभएको थियो ।
त्यस फोन वार्ताका क्रममा उहाँले अघि सारेको वेल्ट एन्ड रोड इनिसिएटिभ्स् जस्तो आयोजनाबाट पनि चीनले अन्तरराष्ट्रियरुपमा सहयोग र समझ्दारी बढाउन चाहेको धारणा राख्नुभएको राजधानी बेइजिङबाट प्राप्त भएको समाचारमा जनाइएको छ ।
त्यस वार्ताका क्रममा उहाँले चीनले कोरोना भाइरसको सङ्क्रमण नियन्त्रणका क्षेत्रमा गरेका कामको बारेमा जानकारी दिनुभएको थियो ।
त्यस्तै उहाँले फोनमा कुरा गरेका नेतासँग ती देशमा महामारीको पछिल्लो अवस्थाको बारेमा पनि जानाकरी लिनुभएको सिन्ह्वा समाचार समितिले चीनको राजधानी बेइजिङबाट जनाएको छ ।
