काठमाडौँ, २४ असारः नेपाली कांग्रेसका केन्द्रीय सदस्य एवं प्रतिनिधिसभा सांसद मोहन आचार्यले रसुवाको भोटेकोशीमा आएको भीषण बाढीबाट भएको क्षतिप्रति गहिरो दुःख व्यक्त गर्दै उद्धारलाई व्यवस्थित र प्रभावकारी बनाउन सरकारको ध्यानाकर्षण गराउनुभएको छ ।
सोमबार सामाजिक सञ्जालमार्फत उहाँले चीनको तिब्बततर्फबाट आएको बाढीले नेपाल–चीन जोड्ने मितेरी पुल बगाएर दुई देशबीचको आवागमन पूर्णरूपमा अवरुद्ध भएको घटनाले सबै नेपालीलाई मर्माहित बनाएको उल्लेख गर्नुभएको छ ।
“बाढीका कारण रसुवाको टिम्मुरे भन्सार यार्ड, त्यहाँ रहेका सामग्री र अन्य महत्त्वपूर्ण पूर्वाधारमा व्यापक क्षति पुगेको छ“, सांसद आचार्यले उल्लेख गर्नुभएको छ, “उद्धारमा खटिएका सुरक्षाकर्मीसमेत जोखिममा परेको खबरले थप चिन्ता सिर्जना गरेको छ ।”
मानवीय क्षतिको आशंका र उद्धारमा देखिएको कठिनाइका कारण क्षतिको सम्पूर्ण विवरण अझै आइनसकेको जनाउँदै उहाँले सरकार, सुरक्षा निकाय र सम्बन्धित सबै पक्षले उद्धार तथा राहत सामग्र वितरणलाई उच्चतम प्राथमिकता दिनुपर्नेमा जोड दिनुभयो ।
अहिले आफू प्रभावित क्षेत्रमा रहेको उल्लेख गर्दै सांसद आचार्यले उद्धार अझ प्रभावकारी र समन्वित बनाउनुपर्ने आवश्यकता औँल्याउनुभयो । सङ्कटको घडीमा सरकारको सक्रियता निर्णायक हुने उहाँको भनाइ छ । उहाँले बाढीबाट प्रभावित सम्पूर्ण नागरिकप्रति सहानुभूति प्रकट गर्नुभएको छ । “हामी सदैव तपाइँहरूको साथमा छौँ,” उहाँले भन्नुभएको छ, “हामी सबै एकजुट भएर यो विपत्तिलाई पार गर्नेछौँ भन्ने दृढ विश्वास लिएको छु ।”
