काठमाडौं, १७ कात्तिक : सञ्चार तथा सूचना प्रविधिमन्त्री जगदीश खरेलसँग नेपालका लागि गणतन्त्र कोरिया (दक्षिण कोरिया) का राजदूत पार्क तइ योङले शिष्टाचार भेट गर्नुभएको छ। सिंहदरबारस्थित सञ्चार मन्त्रालयमा भएको भेटमा नेपाल तथा गणतन्त्र दक्षिण कोरियाबिच द्विपक्षीय ऐतिहासिक सम्बन्ध, द्विपक्षीय सहकार्य तथा वर्तमान अवस्था र नेपाल सरकारका प्रथमिकताका सम्बन्धमा छलफल भएको मन्त्रीको सचिवालयले जनाएको छ।
भेटमा सञ्चारमन्त्री खरेलले नेपाल र दक्षिण कोरियाबिचको सम्बन्ध, नेपालमा दक्षिण कोरियाको सहयोगमा सञ्चालित विकास आयोजनाहरु लगायत नेपालको सूचना प्रविधि क्षेत्रको विकासमा दक्षिण कोरिया सरकारबाट प्राप्त सहयोगका सम्बन्धमा उल्लेख गर्दै नेपालमा डाटा सेन्टरको स्थापनामा गरेको सहयोगका लागि आभार व्यक्त गर्नुभयो ।
मन्त्री खरेलले नेपालको विद्यमान परिस्थितिको साथै स्वतन्त्र तथा निष्पक्ष रुपमा निर्वाचनलाई सम्पन्न गर्ने, भ्रष्टाचार नियन्त्रण र सुशासन प्रवर्धन गर्ने कार्य सरकारको प्रमुख प्राथमिकतामा रहेको समेत जानकारी गराउनुभयो । सञ्चारमन्त्री खरेलले रोजगार अनुमति प्रणाली (इपिएस) मार्फत दक्षिण कोरियाले लामो समयदेखि नेपाली युवालाई रोजगारी प्रदान गरिरहेकोमा सराहना व्यक्त गर्नुभयो ।
सो अवसरमा दक्षिण कोरियाका राजदूत पार्क तइ योङले मन्त्री खरेललाई बधाइ तथा सफल कार्यकालको शुभकामना व्यक्त गर्नुभयो । सो अवसरमा राजदूत योङले नेपालमा दक्षिण कोरियाली सहयोगमा सञ्चालित परियोजनाहरुको अवस्था तथा नेपालमा कोरियाली सरकारको सहयोगको प्राथमिकताका विषयमा जानकारी गराउँदै कोरिया सरकार नेपालको शिक्षा, कृषि, सूचना प्रविधि लगायतका क्षेत्रमार्फत आर्थिक रुपान्तरण एवम् समृद्धिका लागि सहयोग गर्न तत्पर रहेको जानकारी गराउनुभयो ।
उहाँले दक्षिण कोरिया सरकार सदैव नेपालको विकासका लागि नेपालले तय गरेका प्राथमिकताका क्षेत्रमा सहयोग अभिवृद्धि गर्न उत्सुक र प्रतिवद्ध रहेको जानकारी गराउनुभयो । राजदूत योङले नेपाली युवाहरु मेहेनती र इमान्दार रहेको तथा पछिल्लो समय नेपाल कोरियामा वैदेशिक रोजगारीमा पठाउने उत्कृष्ट मुलुक रहेको उल्लेख गर्नुभयो । भेटवार्तामा सञ्चार मन्त्रालय र परराष्ट्र मन्त्रालयका अधिकारीको पनि सहभागिता थियो ।
