पाँचथर, २० असोज : इलाममा बाढी पहिरोमा फसेर पैदल मार्गबाट उद्धार गर्न नसकिएका व्यक्तिको आज बिहानैदेखि नेपाली सेनाको हेलिकाेप्टरबाट उद्धार गरिरहेको छ ।
इलाम जिल्ला माइजोगमाई गा.पा. ५ शिरसिरेबाट विद्या राई, इलाम जिल्ला सन्दकपुर गा.पा. १ छाँगेबाट कमलादेवी राई, पाँचथर जिल्ला फिदिम न.पा. १२ पुल भञ्याङ्गबाट २४ वर्ष वर्षीया लिम्सा लिम्बु र संखुवासभा जिल्ला भोटखोला गाउँपालिका वडा ३ हुङगुङबाट ४२ वर्षीया छिटेक भोटे गरी जम्मा चार जना गर्भवती महिलाहरूको नेपाली सेनाको हेलिकप्टरबाट उद्धार गरी बि.एण्ड.सि. अस्पताल झापा र कोशी प्रादेशिक अस्पताल विराटनगर लगिएकाे हाे ।
यसअघि इलामको माबुवाट ४ जनालाई आजै बिहान हेलिकाेप्टरमार्फत उद्धार गरिएको थियो । सडक मार्गबाट उद्धार गर्न नसकिएपछि हेलिकाेप्टरमार्फत् उद्धार गरिएको गडिथुम्कास्थित नेपाली सेनाको रणशार्दूल गणका प्रमुख प्रल्हाद घलेले जानकारी दिनुभयो ।
जिल्लााभर आज पनि नेपाली सेना, सशस्त्र प्रहरी र नेपाल प्रहरीले खोज अभियान, उद्धार र राहतका लागि काम गरिरहेको इलामका प्रमुख जिल्ला अधिकारी सुनीता नेपालले जानकारी दिनुभयो ।
शनिबार रातीको बाढी पहिरोमा परी इलाममा ३७ जनाको ज्यान गएको थियो ।
