भारतका पूर्व घरेलु क्रिकेटर तथा प्रशासक मिथुन मनहास आइतबार भारतीय क्रिकेट नियन्त्रण बोर्ड (बिसिसिआई) का नयाँ अध्यक्षमा सर्वसम्मतिले निर्वाचित हुनुभएको छ ।
मुम्बईमा सम्पन्न बोर्डको वार्षिक साधारण सभापछि मनहासलाई औपचारिक रूपमा अध्यक्ष घोषणा गरिएको हो । उहाँले ७० वर्षको अनिवार्य सेवानिवृत्तिमा पुगेका रोजर बिन्नीलाई प्रतिस्थापन गर्नुभएको हो । उपाध्यक्षमा राजीव शुक्ला र सचिवमा देवजित साइकिया निर्वाचित हुनुभएको छ ।
४५ वर्षीय मनहासले भारतका लागि अन्तर्राष्ट्रिय क्रिकेट खेल्नुभएको थिएन । तर दिल्लीको तर्फबाट खेल्दा उहाँले १५७ प्रथम श्रेणी म्याचमा ४५.८२ औसतसहित नौ हजार ७१४ रन बनाउनुभएको थियो ।
उहाँको समय भारतीय महान खेलाडीहरू सचिन तेन्दुलकर, राहुल द्रविड, सौरभ गाङ्गुली र भिभिएस लक्ष्मणको युगसँग मेल खाएको थियो । त्यसैले राष्ट्रिय टोलीमा प्रवेश गर्ने मौका सीमित रह्यो । दिल्ली टोलीमा समेत उहाँ वीरेन्द्र सेहवाग र गौतम गम्भीरको छायाँमा पर्नुभयो, तर ती दुई स्टार प्रायः राष्ट्रिय कर्तव्यमा व्यस्त हुने भएकाले मनहासले धेरै पटक टोलीको नेतृत्व गर्नुभयो ।
इन्डियन प्रिमियर लिग (आइपिएल) मा उहाँले ५० भन्दा बढी खेल खेल्नुभयो । खेल जीवनपछि भने उहाँ क्रिकेट प्रशासनमा चम्किनुभयो । उहाँले विशेषगरी जम्मु र काश्मीर क्रिकेट सङ्घको निर्देशक रहँदा आधारभूत स्तरको विकासमा योगदान दिनुभयो ।
भारतमा क्रिकेटको अपार लोकप्रियताले बिसिसिआईलाई प्रायोजन र टेलिभिजन सम्झौताबाट विश्वकै धनी खेल निकाय बनाएको छ । यस शक्तिशाली बोर्डको नेतृत्वमा मनहासको उदयलाई सत्तारूढ भारतीय जनता पार्टी (भाजपा) को स्पष्ट समर्थन रहेको बताइन्छ ।
गत हप्तामात्र नयाँदिल्लीमा गृहमन्त्री अमित शाहको निवासमा भएको महत्त्वपूर्ण बैठकमा उहाँलाई उम्मेदवारका रूपमा छनोट गरिएको भारतीय सञ्चारमाध्यमले जनाएका छन् । अमित शाह अन्तर्राष्ट्रिय क्रिकेट काउन्सिल (आइसिसी) का प्रमुख जय शाहका पिता पनि हुनुहुन्छ ।
मनहासको निर्वाचनले भारतीय क्रिकेटमा नयाँ प्रशासनिक अध्याय सुरु भएको मानिएको छ ।
रासस
