काठमाडौँ, १३ भदौ ; सङ्घीय संसद् प्रतिनिधिसभाको आजको बैठकमा सांसदहरुले सीमा विवादबारे सरकारको ध्यानाकर्षण गराउनुभएको छ । उहाहरुले लिपुलेक मार्ग प्रयोग गर्न भारत र चीनबीच भएको सम्झौता गलत रहेको उल्लेख गर्दै यस विषयमा कूटनीतिक संवाद गर्न सरकारसँग आग्रह गर्नुभयो ।
शून्य समयमा आफ्ना धारणा राख्दै सांसदहरुले एक हप्तादेखि आन्दोलनरत उखु किसानहरुको माग जायज रहेको र सम्बोधन गर्न सरकारसँग माग गर्नुभयो । उहाँहरुले आन्दोलनरत उखु किसानहरुले पाउँदै आएको अनुदान र बाँकी बक्यौता रकम तत्काल भुक्तानी गर्न शीघ्र पहल गर्नुपर्नेमा जोड दिनुभयो ।
सांसद महिन्द्रकुमार रायले किसानको जायज माग सम्बोधन गर्न र बाँकी बक्यौता रकम दिन माग गर्नुभयो । उहाँले मधेस क्षेत्रमा अझै पनि खानेपानीको सुविधा पुग्न नसकेको बताउनुभयो ।
सांसदहरु लीलानाथ श्रेष्ठ, रुपा शोशी चौधरी, लेखनाथ दाहाल, राजकिशोर यादव, मीना तामाङ, रेखा यादव, रामशङ्कर यादव र रामकृष्ण यादवले उखु किसानका माग यथोचित रहेकाले यथाशीघ्र सम्बोधन गर्नुपर्ने बताउनुभयो । उहाँहरुले मलखाद किसानलाई उपलब्ध हुन नसकेको र पाए पनि विचौलियामार्फत किन्नुपर्ने बाध्यता रहेको बताउनुभयो ।
सांसद राजकिशोर यादवले प्रश्न गर्नुभयो, “अन्नदाता नै अपमानित हुनुपर्ने ? श्रमको उचित मूल्य पाउन पनि आन्दोलन गर्नुपर्ने ? यस्ता नीतिबाट हामी कहाँ जाँदैछौँ ?”
सांसद रामहरि खतिवडाले सार्वजनिक बिदा दिनेमा नेपाल पहिलो नम्बरमा परेको भन्दै बिदालाई कटौती गर्नुपर्ने र सवारीसाधनमा इम्बोस्ड नम्बर राम्ररी अध्ययन गरेरमात्र लाग्नुपर्ने बताउनुभयो । सांसदहरुले सरकारले नेपालको सार्वभौमिकता र सीमा सुरक्षामा कडाइ अपनाउन पहल गर्नुपर्ने धारणा राख्नुभयो ।
सांसद महेश बस्नेतले नेपालको भूभाग लिपुलेक, कालापानी र लिम्पियाधुरा क्षेत्रलाई नेपालको सहमति बिना नै छिमेकी राष्ट्र भारत र चीनले व्यापारिक केन्द्र बनाउने सहमति आपत्तिजनक रहेको बताउनुभयो । सांसद राजेन्द्रकुमार केसीले प्रधानमन्त्री केपी शर्मा ओलीको आसन्न चीन भ्रमणका क्रममा उक्त सम्झौताबारे छलफल गर्न र छलफल फलदायी बनाउनुपर्ने बताउनुभयो ।
सांसद महेशकुमार बर्तौलाले बजारमा बिक्रीका लागि राखिएका विभिन्न खाद्य पदार्थमा अत्यधिकमात्रामा रासायनिक र विषादी प्रयोगले स्वास्थ्यमा असर पारिरहेको भन्दै स्वास्थ्यसँग जोडिएका विषयमा प्रभावकारी नियमन र कारबाही गर्नुपर्ने माग गर्नुभयो । सांसद माधव सापकोटाले तातोपानी नाका पुग्नका लागि अरनिको राजमार्ग अवरुद्ध हुँदा चाडपर्वको मुखमा बजारको भाउ बढ्नसक्ने भन्दै मार्ग खुलाउन पहल गर्नुपर्ने बताउनुभयो ।
सांसद मेनकाकुमारी पोखरेलले छाउगोठ भत्काएर मात्र समाधान नहुने र यसका लागि सचेतना अभियान नै सञ्चालन गर्नुपर्ने धारणा व्यक्त गर्नुभयो । सांसद रेखा शर्माले दाङको घोरोहीदेखि प्यूठान जोड्ने सडक जीर्ण रहेकाले सो सडक स्तरोन्नति गर्न माग गर्नुभयो । सांसदहरु भीमप्रसाद आचार्य, मेटमणि चौधरी, बिजुला रायमाझी, राजेन्द्र बजगाईं, रणेन्द्र बराली, राजेन्द्रकुमार राई, रुक्मीणी राना बराइली, मङ्गलप्रसाद गुप्ता, रणकुमारी बलमपाकी मगर र रमा कोइराला पौड्यालले समसामियक विषयमा आफ्ना धारणा राख्नुभयो ।
(रासस)
