जेरुसेलम, १३ असार : इजरायलका रक्षामन्त्री इजरायल काट्जले दुई मुलुकबीचको युद्धको समयमा अवसर मिलेको भए इजरायलले इरानका सर्वोच्च नेता अयातोल्लाह अली खामेनीलाई मारेको हुन्थ्यो भन्नुभएको छ ।
“यदि उहाँ हाम्रो निशानामा हुनुहुन्थ्यो भने, हामीले उहाँलाई मारेका हुन्थ्यौँ”, सेनाले ‘धेरै खोजी गरेको’ उल्लेख गर्दै काट्जले बिहीबार साँझ इजरायलको सार्वजनिक रेडियो स्टेसन कानलाई भन्नुभयो, “खामेनीले यो बुझ्नुभयो, धेरै गहिरो भूमिगतमा जानुभयो, कमान्डरहरूसँगको सम्पर्क तोड्नुभयो… त्यसैले अन्त्यमा यो यथार्थवादी थिएन ।”
उहाँले बिहीबार इजरायली टेलिभिजन च्यानल १३ लाई युद्धविराम अघि र युद्धविराम पछि फरक हुने भन्दै इजरायलले आफ्ना हत्या प्रयासहरू रोक्ने बताउनुभयो ।
वासिङ्टनले उहाँको हत्या गर्ने इजरायली योजनालाई भिटो गरेको रिपोर्ट आएको केही दिनपछि काट्जले युद्धको समयमा खामेनीलाई ‘अब अस्तित्वमा रहन दिन सकिँदैन’ भन्नुभएको थियो ।
तर काट्जले खामेनीलाई बङ्करभित्र बस्न सल्लाह दिनुभयो । “उहाँले लामो समयसम्म बङ्करको गहिराइमा बसेका स्वर्गीय नसरल्लाहबाट सिक्नुपर्छ”, लेबनानी लडाकु समूह हिजबुल्लाहका पूर्व नेता हसन नसरल्लाहलाई उल्लेख गर्दै उहाँले भन्नुभयो । नसरल्लाहलाई इजरायलले सन् २०२४ सेप्टेम्बरमा बेरुतको हवाई आक्रमणमा मारेको थियो ।
सत्तामा आएदेखि इरान नछाड्नुभएका सर्वोच्च नेताका गतिविधिहरू कडा सुरक्षा र गोप्यताको अधीनमा छन् ।
काट्जले बिहीबार इजरायलले इरानमाथि आफ्नो हवाई श्रेष्ठता कायम राखेको र फेरि आक्रमण गर्न तयार रहेको बताउनुभयो ।
“हामी इरानलाई आणविक हतियार विकास गर्न र इजरायललाई लामो दूरीको मिसाइलले धम्की दिन दिनेछैनौँ”, उहाँले भन्नुभयो ।
आफ्नो च्यानल १२ अन्तर्वार्तामा काट्जले इजरायललाई इरानको सबै समृद्ध युरेनियमको स्थान थाहा नभएको स्वीकार गर्नुभयो । तर इजरायलको हवाई आक्रमणले इस्लामिक गणतन्त्रको युरेनियम संवर्धन क्षमताहरू नष्ट गरेको बताउनुभयो ।
“सामग्री आफैँ त्यस्तो कुरा थिएन जसलाई तटस्थ पारिनुपर्ने थियो”, उहाँले समृद्ध युरेनियमको बारेमा भन्नुभयो ।
इरानको आणविक कार्यक्रममा इजरायली र अमेरिकी आक्रमणहरूको प्रभाव बहसको विषय भएको छ ।
चुहावट भएको अमेरिकी गुप्तचर मूल्याङ्कनले कार्यक्रमले इरानलाई केही महिना पछाडि धकेलेको अनुमान गरेको छ भने काट्ज र अन्य इजरायली तथा अमेरिकी सार्वजनिक व्यक्तित्वहरूले क्षतिलाई पुनर्निर्माण गर्न वर्षौं लाग्ने बताएका छन् ।
इजरायल र इरान दुवैले जुन २४ मा युद्धविरामसँग समाप्त भएको १२ दिने युद्धमा विजयको दाबी गरेका छन् ।
इजरायलले बमबारी अभियान सुरु गरेपछि युद्ध जुन १३ मा सुरु भयो । इजरायलले इरानलाई आणविक हतियार विकास गर्नबाट रोक्ने उद्देश्यले आक्रमण गरिएको बताएको थियो । इरानले आणविक हतियार प्राप्त गर्ने महत्वाकांक्षालाई निरन्तर अस्वीकार गर्दै आएको छ । (रासस/एएफपी)
