मस्कट, २९ जेठ : लामो समयदेखि शत्रुहरूबीच बढ्दो तनावका बीच सप्ताहन्तमा संयुक्त राज्य अमेरिका र इरानबीच छैटौँ चरणको आणविक वार्ताको आयोजना गर्ने ओमानले बिहीबार बताएको छ ।
“इरानसँगको छैटौँ चरणको अमेरिकी वार्ता यस आइतबार मस्कटमा हुने कुरा पुष्टि गर्न पाउँदा म खुसी छु”, विदेशमन्त्री बद्र अलबुसाइदीले एक्समा एक पोस्टमा भन्नुभयो ।
सन् २०१८ मा आफ्नो पहिलो कार्यकालमा ट्रम्पले परित्याग गर्नुभएको सन् २०१५ को सम्झौता प्रतिस्थापन गर्न नयाँ आणविक सम्झौता गर्न तेहरान र वासिङ्टनले अप्रिलदेखि पाँच चरणको वार्ता गरेका छन् ।
अमेरिकी राष्ट्रपति डोनाल्ड ट्रम्पले अमेरिकी कर्मचारीहरूलाई सम्भावित ‘खतरनाक’ मध्यपूर्वबाट सारिएको बताएको केही घण्टापछि ओमानले यो घोषणा गरेको हो ।
इजरायलले इरानी आणविक सुविधाहरूमा आक्रमण गर्न सक्ने बढ्दो अनुमानका बीच इरानलाई आणविक बम राख्न नदिने कुरा पनि ट्रम्पले दोहोर्याउनुभएको छ ।
बुधबार इरानले द्वन्द्व फैलिएमा यस क्षेत्रमा रहेका अमेरिकी सैन्य अड्डाहरूलाई निशाना बनाउने धम्की दिएको छ ।
ट्रम्पले हालसम्म वार्ताको बारेमा आशावाद व्यक्त गर्नुभएको थियो, तर बुधबार प्रकाशित एक अन्तर्वार्तामा उहाँले सम्झौतामा पुग्ने बारेमा ‘कम विश्वस्त’ भएको बताउनुभयो ।
जनवरीमा पदमा फर्किएपछि ट्रम्पले आणविक कूटनीतिलाई समर्थन गर्दै तर यो असफल भएमा सैन्य कारबाहीको चेतावनी दिँदै तेहरानमाथि आफ्नो ‘अधिकतम दबाब’ अभियान पुनः सुरु गर्नुभएको छ ।
अमेरिकी राष्ट्रपतिले इजरायली प्रधानमन्त्री बेन्जामिन नेतान्याहुलाई वार्ताको मौका दिन इरानको आणविक सुविधाहरूमा आक्रमण गर्न रोक्न दबाब दिएको बताउनुभएको छ, तर बढ्दो रूपमा उहाँले धैर्य गुमाउँदै गरेको सङ्केत दिनुभएको छ । (रासस/एएफपी)
