कीएभ, १९ भदौ : युक्रेनी संसदले रक्षामन्त्रीओलेक्सी रेजनिकोभको राजीनामा स्वीकृत गरेको छ । मङ्गलबार युक्रेनी संसदले देशको रक्षामन्त्री रेजनिकोभलाई पदबाट बर्खास्त गर्ने पक्षमा मतदान गरेको सांसद यारोस्लाभ झलेजन्याकले बताउनुभएको छ ।
उक्त प्रस्तावको पक्षमा ३२७ मत परेको र आवश्यक न्यूनतम २२६ मतभन्दा बढी मत प्राप्त भएको जेलेज्न्याकले टेलिग्राममा उल्लेख गर्नुभएको छ । सन् २०२१ को नोभेम्बरमा रक्षामन्त्री नियुक्त भएका रेजनिकोभले सोमबार संसदका अध्यक्ष रुस्लान स्टेफानचुकलाई राजीनामा पत्र बुझाएको बताउनु भएको थियो ।
आइतबार युक्रेनका राष्ट्रपति भोलोडिमिर जेलेन्स्कीले रेजनिकोभलाई बर्खास्त गर्ने र देशको प्रमुख निजीकरण कोषका प्रमुख रुस्टेम उमरोभलाई उहाँको स्थानमा नियुक्त गर्न संसदमा प्रस्ताव पेश गर्ने बताउनुभएको थियो । झलेज्न्याकका अनुसार उमरोभको नियुक्तिबारे संसदले बुधबारको बैठकमा निर्णय गर्ने सम्भावना रहेको छ ।
