टक्सार (भोजपुर), १३ चैत भोजपुरमा जारी जिल्लाकै प्रतिष्ठित छैटौँ अन्तर्राष्ट्रिय आमन्त्रण मेयर भोजपुर गोल्डकप प्रतियोगिताअन्तर्गत आज भएको अन्तिम क्वार्टरफाइनल खेलमा उदयपुरलाई ४–० गोलले हराउँदै एभिनियर फुटबल क्लब क्यामरुन सेमिफाइनलमा पुगेको छ ।
निर्धारित समयमा क्यामरुनको तर्फबाट ४ गोल हुँदा बसाहा युथ क्लब उदयपुरले कुनै पनि गोल गर्न सकेन । क्यामरुनका तर्फबाट खेलको छैटौँ मिनेटमा जर्सी नं १६ का खेलाडी नगुुइनी, खेलको ६८औँ मिनेटमा जर्सी नं १० का टिमबा, ७३औँ मिनेटमा जर्सी नं १५ का एन सनगोउ र अर्का जर्सी नं ४ का खेलाडी बोयोमोले एक÷एक गोल गर्दै आफ्नो सेमिफाइनलमा पुर्याए ।
प्रतियोगिताको म्यान अफ द म्याच क्यामरुनका नगुुइनी भएका छन् । मङ्गलबार हुने पहिलो सेमिफाइनल खेल आयोजक भोजपुर जिल्ला फुटबल सङ्घ र डाँगीहाट युथ क्लब मोरङका बीचमा हुने आयोजक भोजपुर जिल्ला फुटबल सङ्घका अध्यक्ष प्रवीण सुवालले जानकारी दिनुभयो ।
शुक्रबार भएको पहिलो क्वार्टरफाइनल खेलमा एनबिवाइसी सप्तरीलाई पराजित गर्दै आयोजक भोजपुर जिल्ला फुटबल सङ्घ सेमिफाइनल प्रवेश गरेको छ । शनिबारको दोस्रो खेलमा युकेएफसी भारतलाई हराउँदै डाँगीहाट युथ क्लब मोरङ, सेमिफाइलको यात्रामा पुगेको हो ।
आइतबार भएको तेस्रो क्वार्टरफाइनल खेलमा भगवती स्पोर्ट्स क्लब खोटाङलाई टाइब्रेकरमा हराउँदै गत वर्षको विजेता गोर्खा ब्वाइज रुपन्देही सेमिफाइनलमा पुगेको थियो ।
प्रतियोगितामा दुई बाहिरी र छ नेपाली गरी आठ टिमले सहभागिता जनाएका छन । प्रतियोगितामा युकेएफसी दार्जिलिङ भारत, एभिनियर फुटबल क्लब क्यामरुन, भोजपुर जिल्ला फुटबल सङ्घ, एनबिवाइसी सप्तरी, गोर्खा ब्वाइज रुपन्देही, डाँगीहाट युथ क्लब मोरङ, भगवती स्पोर्ट्स क्लब खोटाङ र बसाहा क्लब उदयपुर सहभागिता जनाएकोे खेल संयोजक आङपासाङ शेर्पाले जानकारी दिनुभयो । रासस
