जाजरकोट, असोज ४ : दुर्गम र पिछडिएको पगरी गुथाइएको जाजरकोटलाई तीन वटा ठूला सडकले बीचमा पारेको छ । छिन्चु–जाजरकोट हुँदै डोल्पा सडक, मध्यपहाडी लोकमार्ग र लुम्बिनी–रारा सडकको बीचमा जाजरकोट रहेको छ । यी सबै सडकको स्तरोन्नतिको काम भइरहेको छ ।
जाजरकोट हुँदै जुम्ला जोड्नका लागि सुरुङ मार्गकोसमेत सम्भाव्यता अध्ययनको काम जारी रहेको छ । मध्यपहाडी लोकमार्गको जाजरकोट खण्डभित्र रहेको ८३ किलोमिटर सडकको कामसमेत जारी रहेको छ । यो सडक खण्डभित्र रहेको सर्वाधिक कठिन ठाउँ मन्ताभिरमा समेत ‘ट्र्याक’ खोल्ने काम सम्पन्न भएको निर्माण कम्पनी सिंह एण्ड ब्रोदरका विश्वास उप्रेतीले जानकारी दिनुभयो ।
निर्माण कम्पनी ब्रोदरले लिएको ठेक्कामध्ये जाजरकोट कुदुदेखि स्याउलीबजार सम्मको १७ किलोमिटरमा कालोपत्रको काम सम्पन्न भएर स्याउलीदेखि कार्कीगाउँ सम्मको १७ किलोमिटरमा पिचको काम जारी रहेको छ । कार्कीगाउँबाट थलहसम्मको २० किलोमिटरमा समेत काम जारी रहेको छ । मन्ताभिर फोडेर कामलाई तीव्रता दिइएको उप्रेतीले जानकारी दिनुभयो ।
थलहदेखि दैलेखको सिमानासम्म २९ किलोमिटर सडकको कालोपत्रको काम पनि सकिएको छ । थलह बजारमा रहेको नदीमा पुल निर्माण नहुँदा निर्माणका सामग्री लिन समस्या भइरहेको निर्माण कम्पनीले बताएका छन् ।
यो आर्थिक वर्षभित्र मध्यपहाडी लोकमार्गअन्तर्गत जाजरकोटखण्डको काम पूरा गर्ने लक्ष्य रहेको छ । त्यस्तै भेरी करिडोरअन्तर्गत जाजरकोट–डोल्पा सडकखण्डको पासागाड रिम्ना सडकखण्डको कालोपत्र चालु आर्थिक वर्षभित्र पूरा गरिने यती विल्ड्रस प्रालि सातदोबाटो ललितपुरका गोरखबहादुर केसीले जानकारी दिनुभयो । सत्र किलोमिटर लम्बाई रहको यो सडकलाई दुई खण्डमा विभाजन गरेर कालोपत्र गर्न लागिएको उहाँले बताउनुभयो ।
छत्तीस महिनाभित्र निर्माण कार्य पूरा गर्ने भन्दै रिम्ना–तल्लुसम्मको कामसमेत सुरु भएको छ । ४० किलोमिटर लम्बाई रहेको उक्त सडकमा कालोपत्र गर्नका लागि रु एक अर्बमा ठेक्का सम्झौता भएको केसीले जानकारी दिनुभयो । यो सडकसमेत चालू आर्थिक वर्षभित्र पूरा गर्ने लक्ष्यसहित कामलाई तीव्रता दिएको केसीको दाबी छ ।
भेरी कोरिडोरमा रहेका डोल्पा खण्डका त्रिपुराकोट, खदाङ र करपगाडमा ‘बेलिव्रिज’ पुल निर्माण भएर सवारीसाधन आवतजावत गरिरहेको सडक डिभिजन चौरजहारीका प्राविधिक सुरेश बस्यालले जानकारी दिनुभयो ।
डोल्पाखण्डकै रुपगाडमा मात्र ‘बेलिव्रिज’ पुल निर्माण हुन बाँकी रहेको छ । त्यस्तै जाजरकोट र रुकुम पश्चिमकोबीच तल्लुमा रहेको भेरी नदीमा पुलको काम वर्षा लगत्तै सुरु हुने उहाँले जानकारी दिनुभयो । जाजरकोटमा रहेको नलगाड नदीमा ‘बेलिव्रिज’ पुल निर्माण कार्य सम्पन्न भइसकेको छ ।
त्यस्तै, लुम्बिनी–रारा सडकखण्डको कामसमेत जारी रहेको छ । भेरी कोरिडोरको काम जति छिटो सकिन्छ जाजरकोट र डोल्पामा निर्माण कार्य जारी रहेका जलविद्युत् आयोजनाको कामलेसमेत तीव्रता पाउने देखिन्छ । नलगाड जलविद्युत् आयोजना चार सय १७ मेगावाट, जगदुल्ला जलविद्युत आयोजना एक सय छ मेगावाट यही सडक खण्डका बीचमा पर्दछन् । भेरी कोरिडोर सडकको छेउमै रहेको नलगाड नगरपालिका–७ स्थित दिल्लीमा नलगाड जलविद्युत आयोजनाको विद्युतगृह निर्माण हुनेछ ।
त्यस्तै, ताक्सुगाड जलविद्युत आयोजना (७ मेगावाट) समेत भेरी कोरिडोरभित्र नै पर्दछ । जगदुल्ला जलविद्युत आयोजना (ए) ८२.३ मेगावाटसमेत यही सडकको बीचमा पर्दछ । जाजरकोट र डोल्पाको सिमानामा रहेको त्रिवेणीबाट मुड्केचुला–४ इल (विद्युत् उत्पादन गृहस्थ) र जगदुल्ला गाउँपालिका– १ हुरिकोटसम्मा सडक त्रिवेणीबाट नै लिनुपर्ने अवस्था रहेको छ । जगदुल्ला जलविद्युत आयोजना चालू आर्थिक वर्षभित्र निर्माणको चरणमा जाने जगदुल्ला हाइड्रोपावर कम्पनीका प्रबन्ध निर्देशक प्रकाश अधिकारीले जानकारी दिनुभयो ।
त्रिवेणीबाट हुरिकोटसम्मको ४५ किलोमिटरमध्ये सडक निर्माणका लागि वातावरणीय प्रभाव मूल्याङ्कन (इआइए) बाँकी रहेको छ, ४५ किलोमिटरमध्ये ३० किलोमिटरको कच्ची कटानको काम सकिएको र बाँकी १५ किलोमिटर सडक मात्र कच्ची कटान गर्न बाँकी रहेको छ । १५ किलोमिटर सडक निर्माणका लागि प्रारम्भिक वातावरणीय परीक्षण (आइइ) गर्न बाँकी भएकाले काम अगाडि बढाउन नसकिएको कम्पनीका प्रोजेक्ट म्यानेजर सञ्जय सापकोटाले जानकारी दिनुभयो ।
प्रदेशको भौतिक पूर्वाधार तथा सहरी विकास मन्त्रालयले उक्त कामलाई सहजीकरण गर्नुपर्ने दायित्व रहेको छ । त्रिवेणीस्थित भेरी नदीको पुल निर्माण कार्यसमेत ढिला हुँदा समस्या भएको छ । अब वर्षायाम सकिनवित्तिकै उक्त काम सुरु हुने सापकोटाले जानकारी दिनुभयो । यहाँ अन्य साना पुल सात वटा निर्माण गर्न बाँकी रहेको छ । यी सबै पुल कम्पनीले नै निर्माण गर्नेछ ।
