गलेश्वर, चैत २७ : स्थानीय निर्वाचनको ३६ दिन बाँकी रहँदा म्याग्दीमा सबै दलहरूका आकाङ्क्षीहरू जनमत आफ्नो पक्षमा लिन आन्तरिक तयारीमा जुटेका छन् । सत्ता गठबन्धनमा संलग्न दलहरूले जिल्लामा तालमेल गरेर निर्वाचनमा जाने र पाँचवटै पार्टीका तर्फबाट संयुक्त उम्मेदवार उठाउने निर्णय गरेपछि नेकपा (एमाले)ले नयाँ चुनावी रणनीतिको खोजी गरिरहेको बुझिएको छ ।
विसं २०७४ को निर्वाचनमा बेनी नगरपालिकाको प्रमुखसहित एक वडाध्यक्षमा चित्त बुझाएको नेपाली कांग्रेसले अहिले बेनी नगरपालिकाका–१० वटै वडाहरू जित्ने रणनीतिका साथ अघि बढेको छ भने एमालेले नगरपालिकामा आफ्नो पुरानो साख जोगाउँदै प्रमुख र उपप्रमुख पनि जित्ने तयारीका साथ उम्मेदवार छनोट गर्ने जनाएको छ । विसं २०७४ को निर्वाचनमा बेनी नगरपालिकामा एमालेले आठवटा वडा जितेको थियो । एमालेले गत स्थानीय तहको निर्वाचनमा म्याग्दीका ६ स्थानीय तहहरूमध्ये धवलागिरि र मङ्गला गाउँपालिकामा प्रमुख र उपप्रमुखसहित अन्य चार वडा स्थानीय तहका अधिकांश वडाहरू जितेको थियो ।
कांग्रेसले चार स्थानीय तहमा जीत हात पारेको तर अहिलेको अवस्था भने फेरिएको छ । एमालेको मतभन्दा तत्कालीन अवस्थामा कांग्रेस र माओवादीले ल्याएको मत मात्रै जोड्दा पनि अधिकांश पालिकामा एमाले पछि देखिन्छ । त्यसमाथि एमालेबाट विभाजन भएको नेकपा (एकीकृत समाजवादी), जसपा तथा राष्ट्रिय जनमोर्चाको मत गठबन्धनमा जोड्दा एमालेलाई आगामी चुनावको विरासत जोगाउन चुनौती छ ।
सत्ता गठबन्धनको चुनावी तालमेल
आगामी वैशाख ३० गते हुने स्थानीय तह निर्वाचनमा म्याग्दीमा सत्ता गठबन्धनले चुनावी तालमेल गर्ने भएका छन् । सत्ता गठबन्धनमा संलग्न दलहरूले जिल्लामा पनि चुनावी तालमेल गरेर निर्वाचनमा जाने निर्णय गरेपछि एमालेले पनि नयाँ रणनीति उपनाउने बुझिएको छ । जसअन्तर्गत एमाले राप्रपासँग मिलेर चुनावमा जानसक्ने आङ्कलन गरिएको छ ।
बिहीबार बेनीमा बसेको बैठकले जिल्लाको ६ वटै स्थानीय तहमा चुनावी तालमेल गर्ने सहमति कायम गरेका हुन् । कांग्रेस म्याग्दीका सभापति खमबहादुर गर्बुजा ‘खम्वीर’को संयोजकत्वमा बसेको पाँच दलको बैठकले आगामी ३० वैशाखमा हुने निर्वाचनमा सबै स्थानीय तहमा साझा उम्मेद्वार बनाएर जाने सहमति गरेका हुन् ।
वडा तहबाट आएको रिपोर्टका आधारमा साझा उम्मेदवारको टुङ्गो लाग्ने कांग्रेस म्याग्दीका सचिव हीराबहादुर पुनले जानकारी दिनुभयो । “सबै दलको वडा तहबाट रिपोर्ट आएपछि अर्को बैठक बसेर रिपोर्टका आधारमा म्याग्दीका सबै वडा र पालिकामा साझा उम्मेदवार उठाउने निर्णय भएको छ”, सचिव पुनले भन्नुभयो । म्याग्दीमा पाँच दलले चुनावी तालमेल गर्न जिल्ला र पालिकास्तरीय संयन्त्रसमेत निर्माण गरेका छन् ।
चुनावी तालमेल गर्ने सैद्धान्तिक सहमति भए पनि कसले कहाँ उम्मेदवारी दिने भन्ने विषयमा भने अझै टुङ्गो लागेको छैन । बैठकमा कांग्रेस सभापति गर्वुजा, माओवादी केन्द्रबाट जिल्ला संयोजक रेशम जुग्जाली, एकीकृत समाजवादीबाट जिल्ला अध्यक्ष कृष्णकुमार विश्वकर्मा, राष्ट्रिय जनमोर्चाबाट जिल्ला अध्यक्ष छवि विश्वकर्मा र जनता समाजवादीबाट देवेन्द्रबहादुर विश्वकर्मा सहभागी हुनुहुन्थ्यो । विसं २०७४ को निर्वाचनमा जिसस उपप्रमुखसहित एक नगरप्रमुख र तीन गाउँपालिका अध्यक्ष, दुई गाउँपालिका उपाध्यक्ष तथा ४५ वटा वडामध्ये १५ वटा वडाध्यक्षमा कांग्रेस विजयी भएको थियो । माओवादी केन्द्रले सातवटा वडाध्यक्ष जितेको थियो ।
त्यस्तै एमालेले जिल्ला समन्वय समितिको प्रमुखसहित दुई गाउँपालिका अध्यक्ष, तीन गाउँपालिका उपाध्यक्ष र २३ वटा वडाध्यक्षमा विजयी भएको थियो भने बेनी नगरको उपप्रमुख राप्रपाले जितेको थियो ।
बढ्यो राजनीतिक सक्रियता
आगामी वैशाख ३० गते हुन लागेको स्थानीय तह निर्वाचनलाई लक्षित गरेर म्याग्दीका राजनीतिक दलहरूले सक्रीयता बढाएका छन् । ग्रामीण क्षेत्रमा राजनीतिक सरगर्मी बढेको हो । वडा र पालिकाका सम्भावित उम्मेदवार तथा परिणामको चर्चा हुन थालेको छ । एमाले, कांग्रेस, माओवादी केन्द्र, एकीकृत समाजवादी, राष्ट्रिय प्रजातन्त्र पार्टी, राष्ट्रिय जनमोर्चालगायत दलले उम्मेदवार छनोट अन्तिम चरणमा पु¥याएका छन् ।
सत्ता गठबन्धनमा आबद्ध दलहरूबीच चुनावी तालमेलको निर्णय भएपछि साझा उम्मेदवार छनोटका लागि छलफल सुरु भएको छ । छवटा स्थानीय तहमा ४५ वटा वडा रहेको म्याग्दीमा ८५ हजार ३७५ जना मतदाता कायम भएका छन् । जिल्ला निर्वाचन अधिकारी भीमप्रसाद घिमिरेले ७४ मतदानस्थल र ११४ मतदान केन्द्र कायम भएको जानकारी दिनुभयो ।
मालिकाका सबै वडामा उम्मेदवार चयन
पश्चिम म्याग्दीको मालिका गाउँपालिकामा रहेका सातवटा वडामा कांग्रेसले वडाध्यक्षका उम्मेदवार छनोट गरेको छ । निर्वाचनका लागि पालिकाका सबै वडामा बसेको कांग्रेसको वडा इकाइ भेलाले सर्वसम्मत सबै वडाध्यक्ष पदमा उम्मेदवार छनोट गरेको हो । वडा नं १ मा वर्तमान वडाध्यक्ष टङ्कप्रसाद पुनलाई दोहो¥याएको छ । पुन कांग्रेस प्रदेशसभा क्षेत्र ‘ख’का सभापतिसमेत हुनुहुन्छ । वडा नं २ मा ताराबहादुर रोका मगरलाई वडाध्यक्ष पदमा उम्मेदवारी छनोट गरेको छ । युवानेता रोका मगर २०७४ को स्थानीय तहको निर्वाचनमा पराजित हुनुभएको थियो ।
वडा नं ३ मा श्यामबहादुर बुढाथोकी मगरलाई वडाध्यक्ष पदमा उम्मेदवार छनोट गरिएको वडा इकाइ कार्यसमितिले जनाएको छ । वडा नं ४ मा भेजेन्द्रमान पुनलाई उम्मेदवार छनोट गरिएको छ । वडा नं ५ मा वर्तमान वडा सदस्य मीम पुनलाई वडाध्यक्ष पदमा उठाउने निर्णय गरिएको वडा इकाइ कार्यसमितिले जनाएको छ । वडा नं ६ मा युवानेता खिमबहादुर पुनलाई वडाध्यक्ष पदमा उठाउने निर्णय गरिएको वडा इकाइ कार्यसमितिले जनाएको छ ।
सामाजिक काममा सक्रिय युवानेता पुन कांग्रेस मालिका गाउँपालिका सभापतिसमेत हुनुहुन्छ । त्यसैगरी वडा नं ७ मा लोककुमार पुनलाई वडाध्यक्ष पदमा उम्मेदवार छनोट गरिएको छ । वडा सदस्यहरूसहित वडाध्यक्षका उम्मेदवार वडा इकाइ भेलाले सर्वसम्मत रुपमा चयन गरेर पालिकालाई सिफारिस गरिएको जनाइएको छ । मालिका गाउँपालिकाको अध्यक्ष पदमा कांग्रेसबाट वर्तमान गाउँपालिका अध्यक्ष श्रीप्रसाद रोका मगर आकाङ्क्षी देखिनुभएको छ । कांग्रेस म्याग्दीले निर्वाचन लक्षित कार्यक्रमलाई तीव्रता दिएको छ ।
