काठमाडौं, फागुन ५ : प्रधानमन्त्री शेरबहादुर देउवा र प्रमुख प्रतिपक्षी दल नेकपा (एमाले) अध्यक्ष केपी शर्मा ओलीबीच भेटवार्ता भएको छ । एमाले अध्यक्ष ओलीका प्रेस संयोजक रामशरण बजगाँईका अनुसार प्रधानमन्त्री देउवा ओलीलाई भेट्न डा आरजु राणा देउवाका साथ बालकोट पुग्नु भएको हो ।
भेटमा समसामयिक राजनीतिक विषयमा छलफल भएको संयोजक बजगाँईले जानकारी दिनुभयो । ‘नेकपा (एमाले)का अध्यक्ष केपी शर्मा ओलीसँग उहाँको निजी निवास बालकोटमा प्रधानमन्त्री तथा कांग्रेस सभापति शेरबहादुर देउवाले समसामयिक राजनीतिबारे भेटवार्ता गर्नु भएको छ,’ बजगाईंले भन्नुभयो । भेटमा के विषयमा छलफल भयो बाहिर आएको छैन ।
यसअघि सत्ता गठबन्धनका दलहरुबीच प्रधानमन्त्री निवास बालुवाटारमा अमेरिकी आर्थिक सहायता मिलिनियम च्यालेन्ज कर्पोरेसन (एमसीसी) सम्बन्धमा छलफल भएको थियो । सत्ता गठबन्धनको बैठक भोलि शुक्रबार बिहान १० बजे पुनः बस्दैछ । प्रधानमन्त्रीनिास बालुवाटारमा सत्ता गठबन्धनको बैठकलगत्तै प्रधानमन्त्री देउवा डा राणाको साथमा ओलीनिवास बालकोट पुग्नु भएको हो ।
