भियना, चैत २ : अस्ट्रियामा कोरोना भाइरसको संक्रमण बढ्ने क्रम तीव्र हुन थालेको भन्दै रोकथामका कडा उपायलाई अवलम्बन गर्न नागरिकलाई सरकारले आग्रह गरेको छ ।
सरकारले आइतबार एक निर्देशन जारी गर्दै संक्रमणलाई नियन्त्रण गर्न पाँच वा सोभन्दा बढी संख्यामा मानिसहरु भेला हुन रोक लगाएको छ । सरकारले अनावश्यक रूपमा हुने आवागमनलाई पनि रोक्न आवश्यक भइसकेको जनाउँदै अत्यावश्यकबाहेक घरभन्दा बाहिर ननिस्कन आग्रह गरेको छ । सरकारले आगामी मंगलबारदेखि यहाँका रेस्टुरेन्टहरु पनि बन्द गर्ने तयारी गरिरहेको सरकारी अधिकारीले बताएका छन् ।
अष्ट्रियामा संक्रमणका कारण एक जनाको मृत्यु भएपछि सरकारले नियन्त्रणका लागि कडा कदम लिएको बताइएको छ । आइतबार संक्रमितको संख्या ८०० पुगेको छ भने पछिल्लो एक दिनमा मात्रै १४५ जनामा संक्रमण देखिएको छ ।
अस्ट्रियाले बेलायत, नेदरल्यान्ड्स, रुस, युक्रेन, इटाली र स्वीजरल्यान्डका नागरिकलाई आफ्नो देश प्रवेशमा प्रतिबन्ध लगाएको छ । यसैबीच विश्वभर एक लाख ५२ हजार ४२८ व्यक्तिमा कोरोना भाइरस संक्रमण पुष्टि भएको विश्व स्वास्थ्य संगठनले आइतबार जनाएको छ ।
उहाँका अनुसार विश्वका १४१ मुलुकमा कोरोनाको संक्रमण फैलिएको र संक्रमितमध्ये पाँच हजार ७२० जनाको उपचारका क्रममा मृत्यु भएको छ । लगभग छ हजारको संख्यामा संक्रमणका जटिल समस्या रहेको विश्व स्वास्थ्य संगठनले जनाएको छ ।
संगठनका प्रवक्ता फादेला चाइबले पछिल्ला दिनमा युरोपमा संक्रमणको प्रकोप बढी देखिएको बताउनुभयो ।
