काठमाडौँ, १७ फागुन : २०७६ को वेदमणि गजल पुरस्कारबाट गजलकार नारायण मिश्रालाई सम्मान गरिने भएको छ । अभिनव साहित्य समाजले सो पुरस्कार प्रदान गर्न लागेको समाजका अध्यक्ष गोविन्दप्रसाद घिमिरे ‘वेदमणि’ ले राससलाई जानकारी दिनुभयो । अक्षयकोषमा रु एक लाख राखी त्यसबाट वार्षिकरुपमा प्राप्त हुने ब्याजले प्रत्येक वर्ष फागुनको अन्तिम साताको शनिबार यो पुरस्कार वितरण गरिन्छ ।
गजल साहित्यका क्षेत्रमा कलम चलाउने साहित्यकारमध्येबाट वर्षभरका रचनाको मूल्याङ्कन गरी पुरस्कार दिने गरिएको हो । रु सात हजार राशिको पुरस्कार समाजको १९आँै वार्षिकोत्सवका अवसरमा वितरण गर्न लागिएको हो । कार्यक्रममा साहित्य साधक शीतल गिरी र वसन्त रिजाललाई पनि सम्मान गरिनेछ । फागुन २४ गते समाजले २१७ आँै मासिक शृङ्खलाअन्तर्गत विशेष कविगोष्ठी समेत आयोजना गर्नेछ । विसं २०५७ फागुन २४ गते शनिबारदेखि समाजले जोरपाटीमा मासिक साहित्यिक कार्यक्रम शुरु गरेको थियो ।
