इटहरी, जेठ ८ : इटहरी उपमहानगरपालिकाको प्रमुख पदमा नेपाली काँग्रेसका उमेदबार विजयी हुनुभएको छ । आइतबार बिहान सार्वजनिक भएको मत परिणाम अनुसार गठबन्धनको तर्फबाट प्रमुख पदमा काँग्रेसका उम्मेदवार हेमकर्ण पौडेलले ३३ हजार ४९ मत ल्याएर विजयी हुनुभएको हो ।
प्रमुख पौडेलका निकटतम् प्रतिद्धन्द्धी नेकपा (एमाले)का यामकुमार सुब्बाले २८ हजार ३१ मत प्राप्त गर्नुभएको छ । इटहरी उपमहानगरपालिकाको नेतृत्वमा प्रतिद्धन्द्धी सुब्बालाइ पाँच हजार १८ मतको अन्तरले पराजित गरी भएको पौडेलको विजय हुनुभएको हो ।
यता उपप्रमुखमा भने नेकपा (एमाले)की उम्मेदवार सङ्गीता चौधरीले ३२ हजार ४ सय ३६ मत ल्याएर विजयी हुनुभएको छ । उपप्रमुखमा गठबन्धनको तर्फबाट उमेदबार बन्नु भएका नेकपा (एकीकृत समाजवादी)का केशव कुमार विष्टले १८ हजार ३१ मत प्राप्त गर्नुभएको छ । उपप्रमुखमा निर्वाचित चौधरीले विष्टलाई १४ हजार ४ सय ५ मतको फराकिलो अन्तरले पराजित गरी विजयी हुनु भएको छ ।
कुल एक लाख ४ हजार मतदाता रहेको इटहरी मा ७३ हजार ८ सय ३२ मत खसेको थियो । जम्मा २० वटा वडा रहेको इटहरी उपमहानगरपालिकामा प्रमुख पदमा विजयी भएपनि काँग्रेसले अधिकांश वडाहरू गुमाएको छ । गत २०७४ सालको स्थानीय तहको निर्वाचनमा १२ वटा वडा जितेको काँग्रेस यस पटक केबल चार वटामा खुम्चिएको छ । नेकपा एमालेले १५ वटा वडा जितेको छ भने एउटा वडामा स्वतन्त्र उम्मेदवार विजयी भएको छ ।
