कोरोनाभाइरस महामारी नियन्त्रण गर्न अमेरिकामा संकटकाल घोषणा

  चैत ०२, २०७६

वासिङ्टन, चैत १ : अमेरिकामा राष्ट्रपति डोनाल्ड ट्रम्पले कोरोना भाइरस संक्रमण प्रकोप फैलिरहेकाले त्यसलाई नियन्त्रण गर्न ‘राष्ट्रिय संकटकाल’ घोषणा गर्नु भएको छ ।

विश्व स्वास्थ्य संगठनले शुक्रबार युरोपलाई कोरोनाभाइरसको नयाँ केन्द्रबिन्दु घोषणा गरेपछि अमेरिकी राष्ट्रपति डोनाल्ड ट्रम्प राज्य संकटकालको घोषणा आएको हो । संकटकालको घोषणा गर्न ट्रम्पले ह्वाइट हाउसबाट टेलिभिजनमार्फत् प्रत्यक्ष सम्बोधन गर्नु भएको थियो ।

अमेरिकामा एक हजार ७०१ जनामा कोरोना भाइरस संक्रमण भएको पुष्टि भइसकेको छ भने ४० भन्दा बढीमा कोभिड–१९ कै कारण मृत्यु भएको सरकारी तथ्यांकले देखाएको छ ।

अमेरिकाका विभिन्न राज्यले कोरोना भाइरस संक्रमणको दर नियन्त्रण गर्न विभिन्न उपाय अपनाइएको छ । त्यहाँ ठूला भेला र खेलकुदका कार्यक्रममा प्रतिबन्ध लगाउनेदेखि विद्यालय बन्द गर्नेसम्मका निर्णय गरिएको छ ।

विश्व स्वास्थ्य सं्गठन कोरोना भाइरस संक्रमणबाट हुने रोग अर्थात् कोभिड–१९ लाई विश्वव्यापी माहामारीको संज्ञा दिइसकेको छ ।

गत डिसेम्बरको अन्त्यबाट चीनको हुबेइ प्रान्तको उहान शहरबाट फैलिएको कोरोनाभाइरस संक्रमणको महामारीको केन्द्रबिन्दु अहिले युरोप भएको छ ।

इटलीमा २४ घण्टामा सर्वाधिक २५० जनाको मृत्यु भयो । अहिलेसम्म त्यहाँ कुल १,२६६ जनाको मृत्यु भइसकेको छ भने १७,६६० मा सङ्क्रमण पुष्टि भएको तथ्याङ्क छ ।

तपाईको प्रतिक्रिया