देउखुरी,माघ १५ : लुम्बिनी प्रदेशका मुख्यमन्त्री लीला गिरीले प्रदेशको स्थायी राजधानी सर्छ कि भन्ने भ्रममा नपर्न सचेत गराउनुभएको छ ।
दाङको घोराही उपमहानगरपालिकाको ४५औँ स्थापना दिवसका अवसरमा आज आयोजित समारोहमा उहाँले राजधानी फर्किनेभन्दा पनि उचित कार्यान्वयनको प्रक्रियामा अघि बढेको बताउनुभयो ।
मुख्यमन्त्री गिरीले कसैकसैले राजधानी जान्छ कि भन्ने शङ्का गर्ने गरेकामा अब दाङबाट राजधानी कुनै हालतमा कतै नजाने बताउनुभयो ।
लुम्बिनी प्रदेशका सबै नागरिकलाई पायक पर्ने स्थानमा राजधानी स्थापित गर्नका लागि सबैले सहयोग गर्नुपर्ने उहाँको भनाइ थियो । उहाँले राजधानी कार्यान्वयनको प्रक्रियामा अघि बढेको हुँदा सबैमा ढुक्क हुन आग्रह गर्नुभयो ।
मुख्यमन्त्री गिरीले अब राजधानी दाङमै हुने हुँदा यसका लागि बाँकी चरणका काम यहाँका सबै तह र तप्का, निकायसँग सहकार्य गरेर कार्यान्वयन गरेर अघि बढ्ने अवगत गराउनुभयो ।
“कसैकसैलाई अझै पनि भ्रम छ, कि फेरि राजधानी बुटवलमै फर्कन्छ कि भनेर, अब राजधानी फर्कंदैन । ढुक्क हुनुस् । अब राजधानी दाङमा हुन्छ, राजधानी देउखुरीमा हुन्छ, यो आशङ्का कोही कसैले नराख्नूस्”, उहाँले भन्नुभयो, “बाँकी चरणका काम यहाँका सबै तहतप्का, निकायसँग सहकार्य गरेर कार्यान्वयन गरेर अघि बढ्नेछौँ ।”
दाङ उपत्यकालाई पर्यटनको महत्त्वपूर्ण गन्तव्यका रूपमा अघि बढाउने सङ्कल्प पूरा गर्न सक्छौँ भन्ने सोचसहित तत्कालीन संस्थापक मुख्यमन्त्री शङ्कर पोखरेल नेतृत्वको सरकारले अघि बढाएको स्मरण गर्दै वर्तमानमा सबैको माया, सद्भावले प्रदेशको नेतृत्व गर्ने मौका आफूले पाएको हुँदा वर्तमान सरकारले यहाँका तमाम विकासका योजना, कार्यक्रम नजिकबाट कार्यान्वयन गर्न, घोराही तुलसीपुर चारलेन सडक पूर्वाधार विकासको कामलाई पूर्णता दिन गम्भीररूपमा अघि बढेको बताउनुभयो ।
यसैगरी विगतको प्रदेशसभाले प्रदेशको स्थायी राजधानी दाङको देउखुरी राप्ती उपत्यकामा स्थापना गर्ने निर्णयलाई भौतिकरूपमा निर्माण गरेर सम्पन्न गर्न केही समय लागे पनि पूरा हुने बताउनुभयो ।
“बुटवलमा बसेर यहाँको राजधानी निर्माण गर्न सकिँदैन भन्ने हामीलाई लाग्यो त्यसैले अहिले हामी देउखुरीबाट सङ्घीय सरकारले प्रदान गरेको सबै खाले कामकारबाहीदेखि लिएर राजधानी निर्माणलगायत प्रदेश सरकारको कामकाज सुरु गर्न सबै मन्त्रालय देउखुरीमै राख्ने गरी संयोजन गर्न थालेका छौँ”, उहाँले भन्नुभयो, “कतिपय अप्ठ्यारा आउँदाखेरि देउखुरीका तीनवटा पालिकासहित लमहीलाई पनि जोडेर तथा आवश्यक परेमा घोराही उपमहानगरपालिका र अरू सीमा जोडिएका अरू पालिकालाई जोडेरसमेत सहभागी गराएर तपाईंहरूको साथ लिएर राजधानी निर्माणको कामसँगै प्रदेश सरकारको काम अघि बढाउने चरणमा छौँ ।”
